_1735354691.gif)
इटहरी : शुक्रवार सुन्दरहरैचा १० को बागझोडा सधैँ झैँ भरिभराउ थियो । पिकनिकको सिजन भएकाले प्राय सोही प्रयोजनमा बागझोडा सिमसार व्यस्त देखिन्छ । बागझोडामा जाडोको मौसममा पिकनिकका अनेकन् रुपरंगको अनुभव गरेको छ ।
माघ ११ गते शुक्रवार भने जाडो मौसमको याद दिलाउने गरी तुसारो पर्यो । सडकहरू हिलाम्मे भए । बर्सातको झल्को मेटिने गरी तुसारोले मौसम चिसो बनायो । चिसो सँगै बागझोडाले नयाँ कार्यक्रमको अनुभूति गर्यो। सखुवाका रुख मुनी काँग्रेस निकट विचार मन्थन भयो ।
चिसो मौसममा तात्तातो बहस चल्यो । रमाइला किस्सा सहितका संवादले माहौल तात्तियो । चिसो वातावरणमा न्यानो बहसले दर्शकदिर्घाको ध्यान तान्यो । करिब ३ घण्टा चलेको बिषयतग बहसको सुरुवात बिपी अध्ययन प्रतिष्ठान नेपाल सुन्दरहरैचाले आयोजना गरेको हो ।
काँग्रेस नगर समिति र बिपी अध्ययन प्रतिष्ठान मोरङको सहकार्यमा सुन्दरहरैचा नगरपालिका भित्रका काँग्रेस नेताहरू सँग बहस भयो । विषयवस्तुमा केन्द्रित भई बहस भएको कार्यक्रममा पालिकाका स्थानीय कार्यकर्ताले सहभागिता मात्र जनाएनन् खुलेर प्रशंसा गरे ।
‘रूख मुनीको गन्थन मन्थन’ले पूर्व मेयर देखि पालिका सभापति सम्म छलफलमा सहभागी भए । प्यानलीस्टलाई प्रश्न मात्र भएन उनीहरूको टिप्पणी पनि भयो । विषयवस्तुमा केन्द्रित संवादको टिप्पणी गर्न टिप्पणीकारले प्रतिक्रिया दिए ।
नेपाली काँग्रेस कोशी प्रदेश सदस्य तथा प्रचार विभाग प्रमुख बाबुराम कोइराला, सुन्दरहरैंचा नगरपालिकाका पूर्व नगरप्रमुख शिवप्रसाद ढकाल, मोरङ सचिव ललित बहादुर श्रेष्ठ, सुन्दरहरैंचा नगर सभापति भक्तिप्रसाद सिटौला र नेपाल लोकतन्त्रवादी आदिवासी जनजाति महासङ्घ नगर सभापति अमृता लिम्बु वक्ताको रूपमा मञ्चमा थिए ।
कोइरालाले ‘राजनीतिमा युवा सहभागिता, राजनीतिक महत्वकांक्षाका सीमाहरूको विषयमा आफ्नो धारणा राखे । श्रेष्ठले सङ्गठन निर्माण कसरी र नेतृत्व पहिचानका आधारहरूको विषयमा गम्भीर सवाल उठाए । स्थानीय तहमा दलीय प्रतिनिधित्वको फाइदा÷बेफाइदा र दलको स्थानीय नेतृत्व सहकार्यको आवश्यकताको विषयमा पूर्व मेयर ढकालले अनुभव सुनाए ।
प्यानलमा सबैभन्दा परिपक्व नेताको रूपमा देखिएका नगर सभापति सिटौलाले राजनीतिक योगदान र त्यागको मूल्याङ्कनको अवस्था बारे खुलस्त पारे । नयाँ पुस्तासँग अग्रज नेतृत्वको अपेक्षा बारे उनले खुलेर धारणा राखे । महासङ्घ सभापति लिम्बुले राजनीतिमा महिला सहभागिता, अवसर र चुनौतीको ऐतिहासिक विषयवस्तु सहित खुलाइन् । वर्तमान समाजमा महिला नेतृत्वको चुनौतीको विषयमा आफ्नो अनुभव सुनाउँदै उनले यस्तै कार्यक्रमको मार्फत बाट नेतृत्व विकासमा टेवा पुग्ने बताइन् ।
विनय बाह्रकोटी र मिराजजंग थापाले संयुक्त रूपमा सञ्चालन गरेको कार्यक्रममा प्रतिष्ठानका मोरङ अध्यक्ष रन्जन ओझा, काँग्रेस प्रदेश सहमहामन्त्री खड्ग फागो, महासमिति सदस्य लोकप्रसाद सङ्ग्रौला र नगर उपसभापति शिव नारायण चौधरीले टिप्पणी गरेका थिए ।
विशेष मन्तव्य राखेका प्रतिष्ठानका केन्द्रीय अध्यक्ष धर्मेन्द्र नेम्वाङले लोकतन्त्रलाई जीवन्त बनाउन यस्ता खाले संवाद र छलफलको महत्त्वपूर्ण भूमिका रहेको बताए । आपसी द्वन्द्व र असमझदारीलाई समाधान गर्न अन्तरक्रिया र संवादको भूमिका हुने भन्दै उनले बिपी अध्ययन प्रतिष्ठान मोरङ र सुन्दरहरैचा नगर समितिलाई धन्यवाद दिए ।
_1664681437.jpg)
