_1735354691.gif)
विराटनगर : सूचनाको हक प्रयोगमा पारदर्शीतासंगै जबाफदेहितामा पनि ध्यान दिनुपर्ने कुरामा जनचेतना अभिवृद्धि आवश्यक भएकोमा कोसी प्रदेशका मुख्यमन्त्री हिक्मतकुमार कार्कीले राष्ट्रिय सूचना आयोगको ध्यानाकर्षण गराएका छन् ।
आयोगद्वारा आज आइतबार आयोजित छलफलमा मुख्यमन्त्री कार्कीले भने ‘सूचनाको हकलाई जबाफदेहितापूर्वक सदुपयोग गर्न आवश्यक छ ।’ सूचनाको हकबाट प्राप्त सूचनाको दुरुपयोग बढेकोले हकसँगै जबाफदेहिता पनि भएको जनचेतना अभिवृद्धि आवश्यक भएको उनले बताएका हुन ।
मुख्यमन्त्रीले भने ‘मुलुकमा बढेको खुलापनले प्राप्त सूचनाप्रति जबाफदेही विहीन दुरुपयोग पनि बढेको जस्तो देखिन्छ ।’ संविधानले सूचनाको हक ग्यारेन्टी गरे पनि त्यसलाई सही अर्थमा बुझ्न जरुरी भएको उनको भनाई थियो ।
सार्वजनिक सूचनालाई आफू अनुकूल हुने गरी मात्र प्रस्तुत गरिने प्रवृत्तिको अन्त्य गर्दै समाज सुसूचित हुने खालको सूचनाहरू सम्प्रेषण हुनुपर्नेमा मुख्यमन्त्री कार्कीले जोड दिए ।
सूचना आयोगका प्रमुख आयुक्त डा. सुरेश आचार्यले स्वच्छ रूपमा काम गर्नेहरूले डराउनु नपर्ने बताउँदै भने ‘यदि तपाईँ हामीले पारदर्शी ढङ्गले काम गर्यौ भने सूचना दिने र लिने दुवै डराउनु पर्दैन ।’ आयोगले अब अनावश्यक सूचना माग्नेसँग पनि छलफल गर्ने र उनीहरूलाई सतर्क गराउने तर्फ लाग्ने उनले बताए ।
प्रमुख डा. आचार्यले भने ‘गलत नियत राखेर कसैले पनि सूचना माग्न नहुने र सूचना दिनेले पनि सूचना अपडेट भएर बस्नुपर्ने बताए ।’ कर्मचारीहरूले पनि सबै सूचना अपडेट गर्नुपर्छ, सूचना दिन पन्छिने भन्दा पनि पुराना सूचनाहरूलाई अपडेट गर्दै जाँदा झन्झट नहुने उनको भनाई छ ।
आयुक्त गगन विष्टले सूचना ज्ञान र शक्तिको स्रोत भएकाले यसलाई सदुपयोग गर्नुपर्ने बताए ।
कोसी प्रदेशका प्रमुख सचिव केदारनाथ शर्माले सूचना लिने र दिनेका बिच नियत राखेर काम गरेमा समस्या उत्पन्न हुने बताउँदै भने ‘सूचना आदान प्रदान असल नियतबाट हुनुपर्दछ ।’ अहिलेको प्रमुख समस्या सूचना अभिलेखीकरणमा देखिएको बताए ।
आयोगका सचिव कमल भट्टराई सहित प्रदेशका कार्यालय प्रमुख, सूचना अधिकारीहरूसँग छलफल भएको हो ।
_1664681437.jpg)
