विराटनगर : मनमोहन प्राविधिक विश्वविद्यालयको आङ्गिक शिक्षालय मनमोहन स्मृति पोलिटेक्निकमा आइतबार देखी ३ दिने ‘स्पोर्टस मिट’ सुरु भएको छ ।

मोरङको बुढीगंगा-१ हात्तीमुढा स्थित विश्वविद्यालय परिसरमा आइतवारदेखी मनमोहन स्मृति ‘ स्पोर्टस मिट’मा पोलिटेक्निकका विभागीय छात्र र छात्राका टिम बिच फुटबल, भलिबल, डोरी तान, बुद्धिचाल, ब्याडमिन्टनका प्रतियोगिता आयोजना गरिएको छ ।

विश्वविद्यालय संरक्षण समिति सदस्य सत्यनारायण चौधरीले स्पोर्टस मिटको उद्घाटन गरेका छन् । उनले शिक्षालयको मात्र नभएर खेलकुद प्रतियोगितामा विश्वविद्यालयका सङ्कायहरू पनि सहभागी रहेको बताए ।

प्राचार्य इन्जिनियर सुदीप अधिकारीले अगामी वर्षदेखि स्पोर्टस मिटलाई प्रदेश स्तरीय प्राविधिक शिक्षालय खेलकुद प्रतियोगिता बनाइने बताए । उद्घाटनमा परीक्षा नियन्त्रक भीम प्रसाद काफ्ले, प्रशासन प्रमुख सुजन भुर्तेल, तालिम संयोजक लोचन न्यौपाने लगायत उपस्थित थिए ।