सुनसरी : उच्च शिक्षालय तथा माध्यमिक विद्यालय सङ्घ हिसान सुनसरीको स्पोर्टस मिट अन्तर्गत भलिबल प्रतियोगिताको उपाधि छात्र तर्फ इटहरीको विश्व आदर्श र छात्रा तर्फ धरान आदर्शले जितेको छ ।
इटहरीको तरहरा स्थित पूर्वाञ्चल कलेजको कोर्टमा सम्पन्न फाइनल खेलमा छात्र तर्फको फाइनलमा विश्व आदर्शले पूर्वाञ्चल कलेजलाई ३-१ को सेटले पराजित गर्दै उपाधि जितेको हो ।
पहिलो सेट ३०-२८ ले जितेको विश्व आदर्शले दोस्रो सेट २२-२५ ले हारेको थियो । तेस्रो सेट २८-२६ ले जितेको विश्व आदर्शले चौथो सेटमा २५-२३ को पुनरागमन जीत हात पार्दै उपाधि जितेको हो ।
गत वर्ष पनि बिश्वआदर्शले उपाधिमाथि कब्जा जमाएको थियो ।
यस्तै छात्रातर्फ धरान आदर्शले पूर्वाञ्चल कलेजलाई ३–१ को सेटले नै पराजित गरेको छ । पहिलो सेट २५-२० ले हारेको धरान आदर्शले त्यसपछि २८-२६, २९-२७ र ३०-२८ को लगातार जीत हात पार्दै च्याम्पियन बनेको हो ।
फुटबलमा पूर्वाञ्चल र सुस्मा कलेज फाइनलमा 
हिसान स्पोर्टस मिट अन्तर्गत हिसान एन्फा सुनसरी कप अन्तर विद्यालय फुटबल प्रतियोगिताको बिहीबार भएको सेमिफाइनल खेलमा विजयी हुँदै सुस्मा कलेज र पूर्वाञ्चल कलेज उपाधि नजिक पुगेका छन् ।
बिहीबारको पहिलो सेमिफाइनल खेलमा पूर्वाञ्चलले प्रिमियर कलेजलाई ४-० ले पराजित गर्दै फाइनलमा स्थान सुरक्षित गरेको हो । 
 बिहीबार नै सम्पन्न दोस्रो सेमिफाइनलमा सुस्मा कलेजले विश्व आदर्शलाई २-१ गोल अन्तरले पराजित गर्दै फाइनलमा स्थान सुरक्षित गरेको हो ।
फाइनल खेल शुक्रवार हुने प्रतियोगिता संयोजक एवं एन्फा सुनसरी महासचिव कोबिदजंग कार्कीले जानकारी दिए । 
क्रिकेटमा बिश्वआदर्श फाइनलमा
हिसान स्पोर्ट मिट अन्तर्गत क्रिकेट प्रतियोगिता अन्तर्गत बिहीबार भएको सेमिफाइनल खेलमा जीत हात पार्दै बिश्वआदर्श कलेज उपाधि नजिक पुगेको छ ।

बिश्वआदर्शले पूर्वाञ्चल कलेजलाई पराजित गर्दै फाइनलमा स्थान सुरक्षित गरेको हो । बिहीबार हुने भनिएको अर्को सेमिफाइनल खेल स्थगित भएको छ । स्मल हेभन कलेज र कस्तुरी कलेजबिच हुने भनिएको सेमिफाइनल खेलमा प्रोटेस्ट परेकाले शुक्रबारसम्मको लागि स्थगित गरिएको छ ।