धरान : धरानका विद्यालयहरि बिच ‘धरान प्लस टु अरेटरी च्यालेन्ज’ वक्तृत्वकला प्रतियोगिताको शुक्रवार भएको सेमिफाइनल प्रतिस्पर्धाबाट १० जना फाइनलका लागि छनोट भएका छन् ।
सहिद स्मृति माविमा भएको सेमिफाइनलमा सहभागी १७ जनामध्ये १० जना फाइनलमा प्रवेश गरेका हुन । फाइनलमा पुग्नेहरूमा शिक्षा निकेतन माविका पूजा लम्साल र लाक्पा तामाङ, पब्लिक हाई स्कुलका आयुष कटवाल र चन्द्रकला राई, सियोन स्कुलका सोनिया नेपाली छन् ।
शिक्षा सन्देश सेकेण्डरी बोर्डिङका देवका कार्की, पब्लिक मावि फुस्रेका बालकुमार राई, धरान मेघा हिमालयनका क्याथ्रीन योन्जन, एम्स एकेडेमीका अदिति झा र धरान माविकी स्मृति लिम्बु फाइनलमा पुगेकी छन् ।
प्रतियोगिताको आयोजना र्‍याडिकल लाइट नेपाल प्रालिले गरेको हो । सेमिफाइनल प्रतिस्पर्धा धरान–८ स्थित सहिद स्मृति माविको सभा हलमा भएको थियो । 
प्रतियोगितामा वक्तृत्वकला प्रस्तुतिका लागि विद्यार्थीहरूलाई युवा र देशको भविष्य, सहिद र लोकतन्त्र र सामाजिक सञ्जालले युवामा पार्ने प्रभाव ३ तीन वटा विषय मध्ये रोजेर एउटामा बोल्न विकल्प दिइएको थियो ।
बिद्यार्थीहरुको आत्मविश्वासमा अभिवृद्धि गरी व्यक्तित्व र नेतृत्व विकास गर्ने उद्देश्यले प्रतियोगिताको आयोजना गरिएको आयोजक प्रालिका अध्यक्ष तीर्थ कार्कीले बताए ।
प्रतियोगिताको निर्णायकहरूमा उपप्राध्यापक राजेश विद्रोही र शिक्षक टङ्क भट्टराई थिए । सोनी यादवले स्वागत मन्तव्य राखेकी थिइन् । सञ्चालन आहाना प्रधानले गरिन् ।