धरान : धरान-१७ स्थित हराइजन क्लबको आयोजनामा सुरु भएको हराइजन रनिङ कप राष्ट्रिय बास्केटबल प्रतियोगिताको उद्घाटन खेलमा त्रिभुवन आर्मी र धरान कालो समूहले विजयी सुरुवात गरेको छ।
शनिवार भएको उद्घाटन खेलमा त्रिभुवन आर्मी क्लबले धरान हरियोलाई र धरान कालोले झापा बास्केटबल टिमलाई क्रमशः ९९-५५ र ६०-४२ को स्कोरले हराउँदै विजयी सुरुवात गरेका छन्।
खेलको म्यान अफ दि म्याच त्रिभुवन आर्मीका निकेश मगर र धरान कालो समूहका रबिन मगर घोषित भए । धरान-१७ स्थित श्री माध्यमिक विद्यालयको बास्केटबल कोर्टमा भएको प्रतियोगितामा त्रिभुवन आर्मीले प्रत्येक क्वाटर  २३-२६-३०-२० र धरान कालो टिमले २६-२५-१९-२६को स्कोर बटुलेको थियो भने धरान हरियो टिमले प्रत्येक खेलमा १६-१८-७-१४ र झापाले ७-१३-१६-६ स्कोर गरेको थियो । 
‘स्वास्थ्यको लागि खेलकुद, शिक्षाको लागि खेलकुद’ भन्ने मूल नाराका साथ धरान-१७ स्थित हराइजन क्लबले आयोजना गरेको प्रतियोगिताको उद्घाटन धरान उपमहानगरपालिकाका निवर्तमान नगर प्रमुख तिलक राईले गरेका थिए ।
उद्घाटनको कार्यक्रमलाई सम्बोधन गदै निवर्तमान नगर प्रमुख राईले धरानको खेलकुदको विकासमा हराईजन बास्केटबलको अतुलनीय भूमिका रहेको बताए ।
उनले खेलले मानिसलाई स्वास्थ्यकर बनाउँदै अनुशासित बनाउँदै अर्थ उपार्जनमा भूमिका खेल्ने बताए । निवर्तमान नगरप्रमुख राईले स्थानीय सरकारले  खेलकुद विकास जोड दिनुपर्ने र खेलकुद सम्बन्धी विभिन्न गतिविधिहरू प्रवर्द्धन र विकास गर्न आवश्यक रहेको  बताए।
चैत्र १२ गतेसम्म सञ्चालन हुने प्रतियोगितामा कुल ६ टिम बिच २ समूहमा लिग प्रणालीमा प्रतिस्पर्धा हुने खेलमा २ समूह विजेता फाइनल खेल पुग्ने क्लबका पुर्वअध्यक्ष वसन्त राईले बताए ।
प्रतियोगितामा ६ वटा टिमहरू त्रिभुवन आर्मी, विशाल मिलन केन्द्र काठमाडौँ, हाउण्ड बास्केटबल, मोरङ बास्केटबल सङ्घ, झापा बास्केटबल सङ्घ, धरान हरियो र धरान कालो सहभागी छन् ।
प्रतियोगिताको विजेताले ट्रफी सहित नगद १ लाख ५१ हजार १ सय ११ रुपैयाँ र उपविजेताले ७५ हजार रुपैयाँ प्राप्त गर्ने छन् ।