_1749430366.gif)
धरान : हराइजन कप राष्ट्रिय बास्केटबलको उपाधिमाथि विभागीय टिम त्रिभुवन आर्मी क्लबले तेस्रो पटक कब्जा जमाएको छ ।
धरान-१७ स्थित श्री माविको बास्केटबल कोर्टमा आज मङ्गलवार भएको ९औँ हराइजन राष्ट्रिय बास्केटबल प्रतियोगिताको फाइनल खेलमा त्रिभुवन आर्मीले कुल ११३-७० को स्कोरले आयोजक हराइजन क्लब धरान कालोलाई हराउँदै उपाधिमा तेस्रो पटक कब्जा जमाएको हो ।
फाइनल खेलको पहिलो, तेस्रो र चौथो क्वाटरमा आर्मी ३८-१३, २७-१४ २७-२१ अङ्कले अगाडि रह्यो । आयोजक हराइजन कालो दोस्रो क्वाटरमा मात्र २२-२१ अङ्कले अगाडि थियो ।
विजेता त्रिभुवन आर्मीले यस अघि पहिलो पटक हराइजन कपको उपाधि २०७६ मा रुपन्देही बास्केटबल सङ्घलाई हराउँदै जितेको थियो । २०७८ मा दोस्रो पटक नेपाल पुलिस क्लबलाई पराजित गर्दै उपाधिमा कब्जा जमाएको थियो ।
त्रिभुवन आर्मीले तेस्रो पटक विजेताको उपाधिसँगै नगद १ लाख ५१ हजार १ सय ११ रुपैयाँ प्राप्त गरेको छ । आयोजक हराइजन क्लब कालोले उपविजेताको नगद पुरस्कार ७५ हजार रुपैयाँमा चित्त बुझाउनु पर्यो ।
प्रतियोगिताको सर्वोत्कृष्ट खेलाडीको पुरस्कार २५ हजार रुपैयाँ निश्चल महर्जनले प्राप्त गरे । उदीयमान खेलाडीको पुरस्कार १० हजार रुपैयाँ धरान कालोका हासिल तामाङले प्राप्त गरे । म्यान अफ दि म्याचको पुरस्कार धरान कालोका सर्बो राईले प्राप्त गरेका छन् ।
विजेता, उपविजेता तथा खेलाडीहरूलाई पूर्व राष्ट्रिय फुटबल खेलाडी हाल प्रशिक्षक इन्दु रसाइली, हराइजन क्लबका अध्यक्ष श्रीभक्त राई लगायत अतिथिहरूले प्रदान गरेका थिए । समापनका प्रमुख अतिथि धरान-१७ का वडाध्यक्ष सूर्यबहादुर भट्टराई मनोज थिए ।
पत्रकार स्वर्णिम राई पुरस्कृत
समापनको अवसरमा यसपालि राससकी पत्रकार स्वर्णिम राईलाई नगद १० हजार रुपैयाँ सहित सम्मान पत्रले पुरस्कृत गरेको छ । क्लबले प्रत्येक वर्ष प्रतियोगिताको समापन प्रतियोगिताका समाचारहरूलाई सम्प्रेषण गर्दै आएका सञ्चारकर्मीलाई सम्मानित गर्दै आएको आएको छ ।
