धरान : कोशी प्रदेश फुटबल सङ्घका अध्यक्ष किशोर राईले धरान रङ्गशालामा रात्रिकालीन खेलकुदका लागि स्थायी गुणस्तरीय फ्लडलाइट आउँदो आर्थिक वर्ष २०८२/०८३ भित्र जडान गर्ने प्रयास जारी रहेको बताएका छन् ।

रङ्गशालामा रात्रिकालीन खेलकुदका लागि फ्लडलाइट जरुरी भएको ९ वर्ष अघि देखी प्रयास भइरहेको उल्लेख गर्दै उनले कोशी प्रदेश सरकारले आउँदो आर्थिक वर्षको बजेटमा २ करोड रुपैयाँ फ्लगलाइटको लागि विनियोजन गर्ने भएको बताए ।

उनले भने ‘हामीले यसअघि ४ करोड ९० लाखको अनुमानित लागतको प्रस्ताव पेश गरेका थियौँ तर आउँदो बजेटमा २ करोड सम्म फ्लडलाइटको लागि बजेट छुट्टिने कुरामा विश्वस्त छौँ ।’

प्रदेश फुटबल सङ्घद्वारा हालै सम्पन्न ‘कोशी प्रदेश प्रिमियर लिग’ आयव्यय सार्वजनिक गर्न आयोजित पत्रकार सम्मेलनमा सञ्चारकर्मीहरूले सोधेको प्रश्नको जवाफमा अध्यक्ष राईले उक्त जानकारी दिएका हुन ।

यसपालि धरानमा पहिलो पटक रङ्गशालामा अस्थायी फ्लडलाइट लगाएर सञ्चालन गरिएको गोधुली फुटबलमा दर्शक सहभागिता बढेकोले रात्रिकालीन खेलकुदको सम्भावना बढाएको बारेमा सञ्चारकर्मीले जिज्ञासा राखेका थिए ।

अन्तर्राष्ट्रिय खेलकुदमा रात्रिकालीन खेलको प्रचलन बढेको बताउँदै नेपालका खेलकुद स्थलहरूमा पनि गुणस्तरीय स्थायी प्रकाशको व्यवस्था हुनुपर्ने आवश्यकता बढेको  उनले बताए ।

विराटनगरमा रात्रिकालीन विराटगोल्डकप सञ्चालन भएसँगै इटहरीमा पनि पोहोर साल रात्रिकालीन गोल्ड आयोजना गरिएको बताउँदै अध्यक्ष राईले अस्थायी फ्लडलाइटबाट गुणस्तरीय प्रकाशमा कमी देखिएपछि यसपालि दिवाकालीन खेल भएको बताए ।

उनले भने ‘अस्थायी फ्लडलाइटमा रात्रिकालीन औपचारिक र ठुला खेलाहरूको आयोजनमा प्राविधिक जोखिम हुन्छ, कुनै पनि टिमले प्रकाश बारेमा ‘कम्प्लेन’ गरे खेल स्थगन हुनसक्छ ।’ त्यसैले प्राविधिक रूपमा गुणस्तरीय फ्लडलाइटको स्थायी व्यवस्थामा जोड दिएको अध्यक्ष राईले बताए ।

सुनसरी जिल्ला खेलकुद विकास समितिका अध्यक्ष दिपक राईले नेपालमा खेलकुदका पूर्वाधारहरू धेरै भएतापनि प्राविधिक सुविधा, विकासको अभाव रहेको बताए । अन्तर्राष्ट्रिय खेलकुद हुने धरान रङ्गशालामा फ्लडलाइट सहित प्राविधिक सुविधाका अन्य धेरै निर्माण कार्य बाँकी रहेको उनको भनाई थियो ।

उनले भने ‘भएका पूर्वाधारहरूले फुटबल सहित खेलकुदको विकासमा जुन योगदान गर्दै आएको छ, त्यसै आधारमा राज्यले लगानी बढाउन आवश्यक छ ।’ धरान रङ्गशाला जिल्ला खेलकुद विकास समितिले रेखदेख गर्दै आएको छ ।

उक्त अवसरमा वरिष्ठ पत्रकार हर्ष सुब्बाले मुलुकमा सङ्घीयता आएपछि खेलकुदको क्षेत्रमा त्यसको कार्यान्वयन गर्ने कार्यमा कोशी प्रदेश फुटबल सङ्घ गठन भएपछि फुटबलमा उदाहरणीय कार्य भइरहेको बताए ।

प्रिमियर लिगको आयव्यय

पत्रकार सम्मेलनमा प्रदेश फुटबल सङ्घको कोषाध्यक्ष आनन्द चौधरीले प्रदेश स्तरीय फुटबल प्रतियोगिता कोशी प्रदेश प्रिमियर लिगको आयव्यय सार्वजनिक गरे ।

सार्वजनिक गरिएको हिसाब अनुसार कुल आय ३६ लाख ६७ हजारमध्ये कुल खर्च २९ लाख ८ हजार खर्च भएर सङ्घको खातामा ६ लाख ९० हजार बचत भएको छ । बचत मध्ये एन्फाबाट २ लाख आउन बाँकी छ ।

हिसाब अनुसार कुल आयमा कोशी प्रदेश सरकारबाट २० लाख प्राप्त भएको थियो । अखिल नेपाल फुटबल सङ्घ (एन्फा)बाट प्राप्त हुने १५ लाख रुपैयाँ मध्ये २ लाख बाँकी रहेको बताइएको छ ।

यसै गरी गोर्खा ब्रुअरीबाट ५० हजार, रेडबुलबाट ५० हजार, धरानका पूर्व खेलाडीहरूबाट ३७ हजार र अन्य दाताहरू बाट ३० हजार सहित कुल आय ३६ लाख ६७ हजार रुपैयाँ रहेको छ ।

कुल व्ययमा नगद पुरस्कार ७ लाख ६५ हजार, पहाडी जिल्लाका क्लबहरूलाई तयारी खर्चमा थप सेवा रकम ४ लाख २० हजार, तराईका जिल्लाहरूलाई विशेष तयारी खर्च २ लाख, रेफ्रि म्याच कमिस्नर ३ लाख ५० हजार, आयोजक समितिु/उपसमितिहरूलाई खान, बस्न २ लाख खर्च भएको छ ।

यसैगरी प्रत्यक्ष प्रसारण, विज्ञापन मिडिया खर्च १ लाख ५० हजार, फ्लाक्स बोर्ड १ लाख ५० हजार, कप, मेडल, प्रमाणपत्र १ लाख ५० हजार, उद्घाटन/समापन समारोह २ लाख ५० हजार, मेडिकल ५० हजार, आवतजावत खाजा खर्च ६० हजार, आयोजक टिमलाई टक सुट ७५ हजार र प्रमुख अतिथिलाई मायाको चिनो अतिथि सत्कार खर्च ६० हजार रहेको उल्लेख छ ।

गत: माघ २८ देखी फागुन ८ गते सम्म धरान रङ्गशालामा सञ्चालित प्रिमियर लिगमा कोशी प्रदेशका ११ प्रदेशका जिल्ला च्याम्पियन क्लबहरू लिग प्रतियोगितामा सामेल थिए ।