_1749430366.gif)
धरान : सेउती खोलामा आउने बढीलाई च्यानलिङ गर्ने भनी आज बिहीबार बिहान नगर प्रमुख हर्क साम्पाङले जेसीभी लगेर काम सुरु गरेपछि धरान–१५ र धरान–५ का समुदाय बिच विवाद उत्पन्न भई झडपको स्थितिमा रिपोर्टिङ गर्न पुगेका पत्रकारहरू माथि प्रमुख साम्पाङका समर्थकहरूले हातपात गरेको छ ।
विवाद भईरहेकोे समयमा पुगेको पत्रकारहरू कपुरी न्युजकी रश्मी प्रधान, कोले न्युजका रोहित कुलुङ राई, गणतन्त्र एफएमका डेबिट बस्नेतलाई हातपात गरेका हुन ।
हातपात गर्ने करिब ५५ वर्षीय मणिराज राई, कवि याक्खा लगायत रहेको पीडित पत्रकारहरूले कानुनी कारबाहीका लागि इलाका प्रहरी कार्यालयमा आजै दिएको निवेदनमा उल्लेख छ ।
उनीहरू प्रमुख साम्पाङका समर्थक भएको पीडित पत्रकारहरूले बताएका छन् ।
उनीहरूले विवाद भइरहेको अवस्थाको भिडियो खिचेकै बेला ‘किन भिडियो खिचेको, कुन पार्टीको पत्रकार हो ? झोलेहरूलाई कुटेर खोदाउनु पर्छ, पार्टीले पठाएको होला भन्दै’ गालीगलौज गर्दै हातपात गरेका थिए ।
पत्रकारहरूले सार्वजनिक स्थलको घटनाको भिडियो खिच्ने पत्रकारहरूको अधिकार हो भनी जवाफ दिँदा उनीहरू झन् आक्रामक भएका थिए । प्रहरी घटनास्थलमा पुगेर स्थिति सम्हालेको थियो । घट्ना लगत्तै पत्रकारहरूले स्वतन्त्र रूपमा रिपोर्टिङ गर्न सुरक्षा माग सहित दोषीलाई कारबाही गर्न ईलाका प्रहरी कार्यालय धरानमा उजुरी दिएका हुन ।
पत्रकारको सुरक्षा र घटनाका दोषीहरूलाई कारवार्हीको माग गर्दे नेपाल पत्रकार महासङ्घ सुनसरी जिल्ला समितिले विज्ञप्ति प्रकाशित गर्दै घट्नाको भर्त्सना गरेको छ ।
पत्रकारलाई हतोत्साहित गर्ने, रिपोर्टिङमा बाधा पु¥याउन हातपात गर्नु कानुनी शासन विरुद्ध प्रेस तथा अभिव्यक्ति स्वतन्त्रता खिलाफ गतिविधि भएकाले तत्काल पक्राउ गरी कानुनी कारबाही गर्न विज्ञप्तिमा माग गरिएको छ ।
