_1749430366.gif)
धरान : सुनसरी उद्योग वाणिज्य सङ्घले आफ्नो वार्षिकोत्सवको अवसरमा धरानमा रक्तदान कार्यक्रम आयोजना गरेको छ ।
‘रक्तदान जीवनदान, रक्तदान महादान’ भन्ने मूल नारासहित आयोजित कार्यक्रममा ५४ पिन्ट रगत सङ्कलन गरिएको सङ्घले जनाएको छ ।
सङ्घले ६२ वर्ष पूरा गरी ६३ औँ वर्ष प्रवेशको उपलक्ष्यमा सङ्घको मिलेनियम हलमा आयोजना गरेको कार्यक्रममा नवनिर्वाचित कार्य समितिले पहिलो गतिविधिका रूपमा रक्तदानलाई रोजेको हो ।
सङ्घका सदस्य एवम् निवर्तमान महासचिव महेन्द्र प्रधानका अनुसार हाल बीपी कोइराला स्वास्थ्य विज्ञान प्रतिष्ठानमा रगतको अभाव महसुस भएकाले सामाजिक उत्तरदायित्व स्वरूप यो अभियान सञ्चालन गरिएको हो ।
कार्यक्रमको प्रमुख आतिथ्य कोसी प्रदेशका संस्थापक सभामुख प्रदीपकुमार भण्डारीले गरेका थिए भने अध्यक्षता सङ्घका नवनिर्वाचित अध्यक्ष गोपाल श्रेष्ठले गरेका थिए । कार्यक्रममा पूर्व अध्यक्षहरू सरोज श्रेष्ठ, गिरिधारी सापकोटा, सङ्घका कार्यसमिति सदस्य समेत रहेका मितेरी डेभलपमेन्ट बैङ्कका अध्यक्ष किशन मास्के लगायत उद्योगी, व्यवसायी, पदाधिकारी तथा सदस्यहरूको सक्रिय सहभागिता रहेको थियो ।
प्रमुख अतिथि भण्डारीले रक्तदानजस्ता मानवीय कार्यले नागरिक जीवनको रक्षा गर्न सक्ने भन्दै यसले सामाजिक उत्तरदायित्वबारे सचेतना बढाउने विश्वास व्यक्त गरे ।
सङ्घले आगामी दिनमा पनि सामाजिक उत्तरदायित्व अन्तर्गत जनस्वास्थ्य, शिक्षा र मानव सेवा सम्बन्धी कार्यक्रमलाई थप व्यवस्थित र प्रभावकारी बनाउने प्रतिबद्धता जनाएको छ । व्यवसायीहरूको हकहितमा आवाज उठाउँदै सङ्घ सामाजिक रूपान्तरणमा पनि अग्रसर हुँदै आएको छ ।
