धरान : वरिष्ठ कवि बम देवान र गीतकार खेम नेपाली जेबी टुहुरे फाउण्डेशनद्वारा सम्मानित भएका छन् ।

जनवादी कलाकार स्वर्गीय जेबी टुहुरेको चौथो स्मृति दिवसका अवसरमा आज शनिवार विराटनगर-५ एभरेष्ट बोर्डिङ स्कुलमा आयोजित साङ्गीतिक कार्यक्रम बिच स्रष्टाद्वयलाई ५० हजार नगद सहित सम्मानित गरिएको हो ।

‘आमा दिदी बहिनी हो’ चर्चित प्रगतिशील गीतका रचयिता, गायक जेबी टुहुरेका बारेमा प्रमुख अतिथि नेपाल सङ्गीत तथा नाट्य प्रज्ञा प्रतिष्ठानका कुलपति निशा शर्मा पोखरेल, नेकपा माओवादीका पोलिटब्युरो सदस्य नेता हरिवोल गजुरेल, पूर्व मुख्यमन्त्री केदार कार्की लगायतले कार्यक्रममा चर्चा गरेका थिए ।

कवि देवान र गीतकार संस्कृतिकर्मी नेपालीले सामाजिक र सांस्कृतिक रूपान्तरण अभियानमा समर्पित भई पुर्‍याएको योगदानको उच्च कदर गर्दै सम्मानित गरिएको फाउण्डेशनले प्रदान गरेको सम्मान पत्रमा उल्लेख छ ।

सम्मान कार्यक्रमको सभापतित्व जेबी टुहुरे फाउन्डेसनकी अध्यक्ष निर्भीक टुहुरेले गरेकी थिइन । स्मृति दिवसमा टुहुरेका कालजयी गीत, सङ्गीतबाट उनको स्मरण गरिएको थियो ।