_1749430366.gif)
धरान : कोशी प्रदेशस्तरीय खुल्ला प्रो–एमेच्योर गल्फ प्रतियोगिताको उपाधि सन्देश राईले जितेका छन्। उनले नगद ८ हजार रुपैयाँ पुरस्कार प्राप्त गरे। उपविजेता सुन्दर राई भए। उनले पनि नगद ८ हजार रुपैयाँ हात पारे।
धरान गल्फ क्लबको आयोजनामा धरान–१८ स्थित धरान गल्फ क्लबको कोर्समा शुक्रवारदेखि सुरु भएको प्रतियोगिता शनिवार सम्पन्न भएको हो।
सिनियरतर्फ जोग मोहन राई विजेता बने। उनले नगद ६ हजार रुपैयाँ प्राप्त गरे। महिलातर्फ बिना सापकोटा विजेता बनिन्। उनले ५ हजार रुपैयाँ पुरस्कार पाइन्।
जुनियर फस्ट रनर अप प्रयास बस्नेतले ६ हजार रुपैयाँ, मस्ट ब्राइड राजेश राईले ४ हजार रुपैयाँ, नियरेस्ट टु द पिन राज प्रधानले ५ हजार रुपैयाँ र लङ्गेस्ट ड्राइभ विवेक राईले ३ हजार रुपैयाँ पुरस्कार प्राप्त गरे।
सेकेन्ड रनर अप पूर्ण लिम्बु, फस्ट रनर अप दिलबहादुर गुरुङ तथा जुनियर विजेता सिद्धान्त राई बने। उनीहरूले ट्रफी र गल्फ बल प्राप्त गरे।
प्रतियोगिताको पहिलो दिन भएको प्रोफेसनल प्रतिस्पर्धामा सुमन परियार विजेता, सुमन राई उपविजेता, टङ्कबहादुर कार्की तेस्रो, राजकुमार राई ९राजेन० चौथो, थामबहादुर राई पाँचौँ, सविन सापकोटा छैटौँ, सुमन सापकोटा सातौँ र बलभद्र राई आठौँ स्थानमा रहे। उनीहरूले जनही १० हजार रुपैयाँ नगद पुरस्कार प्राप्त गरे।
विजेता तथा उपविजेता लाई धरान उपमहानगरपालिकाका कार्यवाहक प्रमुख अईन्द्र विक्रम बेघाले पुरस्कार वितरण गर्दै आगामी बजेटमा रेड बुकमार्फत गल्फ खेल प्रवर्द्धनका लागि बजेट विनियोजन गरिने प्रतिबद्धता व्यक्त गरे।
कार्यक्रममा धरान–१८ का वडाध्यक्ष प्रवीण राई, १९ का वडाध्यक्ष पूर्ण लिम्बु लगायत गल्फ खेलाडीहरूको उपस्थिति थियो।
एमेच्योर प्रतिस्पर्धामा जुनियरतर्फ ९ जना, प्रोफेसनलतर्फ ८ जना गरी कुल ५८ खेलाडी सहभागी रहेको आयोजक धरान गल्फ क्लबका अध्यक्ष हरिबहादुर राईले जानकारी दिए।
