धरान : तत्कालीन नगर प्रमुख हर्क साम्पाङले बिक्री वितरणमा लगाएको रोक खारेज गर्दै धरान उपमहानगरपालिकाका कार्यवाहक मेयर आइन्द्रविक्रम बेघाले धरान १७ डाँडाघोपा क्षेत्रको जग्गा बिक्री वितरण फुकुवा गरिदिएका छन् ।
किनबेचमा २ वर्ष अघिदेखि लगाएको रोक्का कार्यवाहक प्रमुख बेघाले हर्क साम्पाङको निर्णय खारेज गर्दै मङ्गलवार जग्गा कारोबार खुला गर्ने निर्णय गरेका हुन ।
२०८० भदौ ११ गते तत्कालीन नगर प्रमुख साम्पाङको निर्णयबाट डाँडा घोपामा प्रस्तावित एयरपोर्ट निर्माणको नाममा जग्गा बिक्री वितरण सिफारिसमा पूर्ण रोक्का लगाइएको थियो ।
तर दुई वर्ष बितिसक्दा पनि एयरपोर्ट निर्माण सम्बन्धी कुनै ठोस योजना, स्वीकृति वा कार्यान्वयन प्रक्रिया अगाडि नबढेपछि जग्गाधनीहरूको निरन्तर निवेदन परे पछि जग्गा रोक्का फुकुवा गरिएको बताइएको छ ।
कावा प्रमुख बेघा द्वारा हस्ताक्षरित पत्रमा “एयरपोर्ट निर्माणको विषयमा कुनै टुङ्गो नलागेको अवस्थामा लामो समयसम्म व्यक्तिको निजी सम्पत्तिमा रोक्का लगाइरहनु उपयुक्त नदेखिएकाले यति इनकर्पोरेट प्रालिका नाममा रहेका जग्गा बाहेक अन्य सबै जग्गाको बिक्री–वितरण सिफारिस आजकै मितिबाट फुकुवा गरिएको हो ।’
कावा प्रमुख बेघाको निर्णयसँगै धरान १७ डाँडा घोपामा दुई वर्षदेखि रोकिएको जग्गा कारोबार पुनः सुरु हुने भएको छ ।
