धरानः : नेपाल बसोबास बस्ती संरक्षण समाजले आसन्न चुनावमा सुनसरी क्षेत्र १ का उम्मेदवार मनोज भट्टराईलाई समर्थन र सहयोगको घोषणा गरेको छ ।
सन्ध्या इन होटेलमा शनिवार आयोजित पत्रकार सम्मेलनमा समाजका सुनसरी अध्यक्ष थाम्सेर लिम्बुले सुकुम्वासी तथा भूमिहीनको समस्या समाधान गर्ने एक मात्र पार्टी नेपाली कम्युनिस्ट पार्टी भएको बताउँदै पार्टीका उम्मेदवार मनोज भट्टराईलाई समर्थन गर्ने निर्णय गरेको घोषणा गरेका हुन ।
लिम्बुले पुष्पकमल दाहाल प्रधानमन्त्री भएको कार्यकालमा सुकुम्वासी आयोग गठन भई घर नम्बर वितरण,लालपुर्जा प्रक्रिया सुरु भएको बताउँदै सुकुम्वासी व्यवस्थापनमा नेकपाले ऐतिहासिक पहल गरेको बताए ।
यसै बिच समाजले विज्ञप्ति जारी गर्दे सुनसरी १ क्षेत्रमा रहेका करिब १४ हजार घरपरिवार भूमिहीन सुकुम्वासी, अव्यवस्थित परिवारलाई उम्मेदवार मनोज भट्टराईलाई मतदान गर्न आह्वान गरेको छ ।
विज्ञप्तिमा संरक्षण समाज सुनसरी अध्यक्ष थाम्सेर लिम्बु र धरान नगर अध्यक्ष आइत बहादुर लिम्बुको हस्ताक्षर छ ।
यसै बिच केन्द्रीय अध्यक्ष कुमार कार्कीले विज्ञप्ति जारी गर्दै देशव्यापी रूपमा नेकपाका उम्मेदवारहरूलाई समर्थन गर्न आह्वान गरेका छन् ।
विज्ञप्तिमा प्रजातन्त्रपछि ७ निर्वाचन, ३३ सरकार र १९ वटा सुकुम्वासी आयोग बने पनि राज्यले समस्या समाधान गर्न नसकेको उल्लेख गर्दै अब फास्ट ट्र्याक प्रक्रियाबाट बसोबासको आधारमा लालपुर्जा वितरण गर्ने नीति निर्माणको माग गरिएको छ ।
