_1749430366.gif)
धरान : धारामा एक दिन पानी नआउँदा हाहाकार मच्चिने धरानमा खानेपानीको महसुल भने बसौँ नतिरेर लाख रुपैयाँ बक्यौता राख्ने ग्राहकहरू पनि छन् ।
धरानमा कुल खानेपानी ग्राहक सङ्ख्या २८ हजार रहेको छ । तीमध्ये नियमित महसुल तिर्ने ग्राहकको सङ्ख्या २२ हजार ४५० छन् । ५ हजार ५५० ग्राहकले भने लामो समयदेखि महसुल नबुझाएको धरान खानेपानी व्यवस्थापन बोर्डले जनाएको छ ।
त्यसरी महसुल नबुझाउने ३० जना ग्राहकले प्रतिव्यक्ति १ लाख रुपैयाँ सम्म पुग्दा पनि पानीको महसुल बुझाएका छैनन् । लाख रुपैयाँ नाघेका व्यक्तिगत तथा सङ्घ-संस्था ३० ग्राहकबाट ३१ लाख ६१ हजार ६२२ रुपैयाँ २३ पैसा बक्यौता रहेको बोर्ड कार्यालयले जानकारी दिएको छ।
यसरी महसुल नतिरी बाँकी राख्नेहरूको कुल रकम हाल सम्म ३९ करोड ८१ लाख ५७२ रुपैयाँ २३ पैसा बक्यौता रहेको बोर्डले जनाएको छ । त्यसमध्ये व्यक्तिगत ५ हजार ५२० ग्राहकबाट ३ करोड ६६ लाख ४८ हजार ९५० रुपैयाँ बाँकी रहेको बताइएको छ ।
खानेपानी व्यवस्थापन बोर्डले उक्त जानकारी कपुरी न्युजले सूचनाको हक प्रयोग गरी लिखित रूपमा माग गरेपछि मात्र बोर्डका निर्देशक राजु पोख्रेलले दिएका हुन ।
धरान खानेपानी व्यवस्थापन बोर्डले हालै लामो समय महसुल नतिर्ने ग्राहकहरूलाई जरिवाना मिनाहा गरेको सूचना जारी गरेपछि महसुल नतिर्ने सरकारी, गैरसरकारी र व्यक्तिगत ग्राहकहरू बारे ‘कपुरी न्युज’ले बोर्ड कार्यालयसँग जानकारी माग्दा ‘बाँकी बक्यौता’ विवरणको जानकारी दिन नमिल्ने बताएकाले सूचनाको हक प्रयोग गरिएको हो ।
खानेपानी बोर्डको अध्यक्षता सम्हाल्ने बित्तिकै धरान उपमहानगरपालिका कार्यवाहक प्रमुख अइन्द्रविक्रम बेघाले खानेपानी बोर्डको सबै काम कारबाही, आर्थिक हिसाब किताब महिना पिच्छे सार्वजनिक गर्दै धरानको खानेपानीलाई पारदर्शी बनाउने उद्घोष गरेका थिए ।
तर खानेपानीको महसुल सङ्कलन भएको हिसाब बाहेक बाँकी बक्यौताको रकम भने पारदर्शी बनाएका थिएनन् । सूचनाको हक प्रयोग गरेर माग गर्दा मात्र उक्त हिसाब दिइएको हो ।
धरानमा खानेपानीको लागि पछिल्लो समय तत्कालीन नगर प्रमुख हर्क साम्पाङको श्रमदान अभियान र देश विदेशका दाताहरूको करौडौं आर्थिक सहयोग लगानी भएको छ । जनताको श्रम र आर्थिक लगानी परेको खानेपानीको लाखौँ रुपैयाँ महसुल वर्षौ बक्यौतालाई सूची सार्वजनिक गरेर पारदर्शी गरिनु जरुरी छ ।
बोर्डका निर्देशक राजु पोख्रेलका अनुसार खानेपानीको महसुल तिर्न ढिलाइ गरेपछि ताकेता गर्ने र जरिवानाको व्यवस्था पनि छ । उनका अनुसार ३० दिन कटेपछि १० प्रतिशत, ६० दिनपछि २० प्रतिशत र ९० दिन कटेपछि ५० प्रतिशत सम्म जरिवाना लाग्छ ।
तर बोर्डले अहिले सम्म महसुल तिर्न विलम्ब गर्नेहरूबाट कति जरिवाना असुल गर्यो ? बक्यौता असुलीकालागि ताकेता गरेको बारेमा भने कुनै जानकारी बोर्डले दिएको छैन ।
बोर्डका अध्यक्ष अइन्द्र विक्रम बेघाले यस महिनाभित्र बक्यौता महसुल नबुझाउने ग्राहकहरूलाई कारबाही गरिने बताए । उनले भने, “महसुल नतिर्ने ग्राहकको घरको धारा काटिनेछ, बेलैमा खानेपानी महसुल तिर्नुहोला ।”
बोर्डले २०८२ चैत २२ गते सूचना प्रकाशित गर्दै पुरानो बक्यौता भएका ग्राहकलाई जरिवाना छुट दिने व्यवस्था गरेको छ । बोर्डले वैशाख मसान्त सम्म बक्यौता रकम तिरेमा पुरानो बक्यौतामा लाग्ने सम्पूर्ण जरिवाना छुट दिने निर्णय गरिएको छ ।
तर कति रकम सम्म छुट दिइने भन्ने विषय भने खुलाइएको छैन ।
