इटहरी : कोशी प्रदेश सरकारले आगामी आर्थिक वर्ष २०८३/०८४ को बजेट नीति तथा कार्यक्रम सार्वजनिक गरेको छ ।
बिहीबार कोशी प्रदेश सभामा प्रदेश प्रमुख पर्शुराम खापुङले नीति तथा कार्यक्रम सार्वजनिक गरेका हुन् ।
धरान देखि धनकुटाको लेउती खोला सम्म सुरुङ मार्ग निर्माण गरिने सरकारको योजना छ । यसअघि पनि बारम्बार धरान लेउती सुरुङ मार्गका आयोजना सार्वजनिक भएका थिए । तर कार्यान्वयनको प्रक्रिया सुरु नहुँदा पुनः सोही कार्यक्रम दोहोरिएको हो । नेपालकै होचो भूभाग झापाको कचनकवल देखि सगरमाथा सम्म द्रुतमार्ग निर्माणको कामलाई सरकारले प्राथमिकतामा राखेको छ । पर्यटन प्रवर्द्धनका लागि २०८३ साउनदेखि २०८५ असारसम्मको अवधिलाई ‘कोशी प्रदेश भ्रमण वर्ष’ घोषणा गरेको छ ।
कृषि क्षेत्रको विकास र पहिचानका लागि अन्तर्राष्ट्रिय चिया सम्मेलन आयोजना गर्ने लक्ष्य सरकारले लिएको छ ।
खेलकुदको विकासका लागि विराटनगरस्थित गिरिजाप्रसाद कोइराला क्रिकेट रङ्गशालालाई अन्तर्राष्ट्रियस्तरको बनाउन विशेष पहल गरिने प्रदेश प्रमुख खापुङले बताए ।
कोशी प्रदेश सरकारले अन्तर प्रदेश समन्वय र सहकार्य अभिवृद्धि गर्न मुख्यमन्त्री सम्मेलन आयोजना गर्ने भएको छ । प्रदेशका हिमाली र पहाडी क्षेत्रबाट बढ्दो बसाइसराइ न्यूनीकरण गर्न शिक्षा, स्वास्थ्य तथा खानेपानीको पहुँच विस्तारको योजना अगाडी सारिएको हो । त्यसको लागि रोजगारी र आय आर्जनका अवसर सिर्जना गर्ने र सङ्घीय एवम् स्थानीय तहसँगको समन्वयमा दिगो बसोबास सुनिश्चितताका लागि न्यूनतम पूर्वाधारसहितका साना सहर विकास गर्ने घोषणा गरिने भएको छ ।
