इटहरी : कृषि उपज उत्पादनलाई भण्डारण गर्न निर्माण गरिएको कोल्ड स्टोर अलपत्र अवस्थामा पुगेको छ । सुन्दरहरैचा नगरपालिका वडा नम्बर ७ स्थित गछियामा निर्माण गरिएको कोल्ड स्टोर सञ्चालनमा आउन नसकेको हो ।
सङ्घीय सरकार र स्थानीय सरकारको संयुक्त लगानीमा निर्माण भएको कोल्ड स्टोर तिन पटक सम्म टेन्डर आह्वान गर्दा समेत टेन्डर पर्न सकेन ।वडा नम्बर ७ का वडाध्यक्ष भुवनसिंह मगरका अनुसार दुईबर्ष अगाडी नै निर्माण सम्पन्न भएको कोल्ड स्टोर सञ्चालनको लागि नगरपालिकाले बारम्बार टेन्डर आह्वान गरेको छ ।
सुरुमा मासिक ४० हजारको लागि टेन्डर खुलाए पनि कसैले चासो नदिएपछि ३५ हजारमा घटाइएको उनको भनाइ छ ।घटाएरै भए पनि सञ्चालन गर्ने तयारीमा पालिका लागेको तर व्यवसायीले इच्छा नदेखाएको मगरले बताए ।
फलफूल तथा तरकारीको भण्डारण गरी वितरण गर्न निर्माण गरिएको सुविधा सम्पन्न कोल्ड स्टोर चलाउन कुनै पनि व्यवसायी आकर्षित भएका छैनन् । गछिया बजारमा उपभोग हुने तरकारी तथा फलफूल इटहरी र केही पहाडी जिल्लाबाट सिधै उपभोक्ता सम्म पुग्ने भएकाले व्यवसायीले त्यसतर्फ ध्यान दिएका छैनन् ।
इटहरीमा समेत २३ अर्बको अर्को कोल्ड स्टोर सञ्चालनमा आउने तयारीमा छ ।लामो समय भण्डारण गर्नुपर्ने उपभोग्य सामग्री नभएको कारण कोल्ड स्टोर सञ्चालनमा नआई खण्डहर बन्ने अवस्थामा पुगेको हो । हाल कोल्ड स्टोर वरपर बाक्लो घाँस पलाएको छ । साजीलाल माविको जमिनमा निर्माण भएको सो संरचना कहिले सञ्चालनमा आउने अझै निधो हुन सकेको छैन ।
