धरान : धरान उपमहानगरपालिकाले छात्राहरूका लागि गुणस्तरीय प्याड आफै टेन्डरबाट खरिद गरी विद्यालयहरूलाई दिनु पर्नेमा खरिद तथा वितरण प्रक्रियाको मापदण्ड र कार्यविधि पालना नगरी विद्यालय लाइनै खरिद गर्न रकम वितरण गर्दा १४ लाख रुपैयाँ बढी खर्च भएको महालेखा परीक्षकको प्रतिवेदनमा जनाइएको छ ।
प्रतिवेदन अनुसार सेनेटरी प्याड (वितरण तथा व्यवस्थापन) कार्यविधि,२०७६ ले तोकेको न्यूनतम मापदण्ड अनुसार खरिद तथा गुणस्तर परीक्षण हुनुपर्ने व्यवस्था भए पनि उपमहानगरपालिकाले व्यवहारमा पालना नभएको देखिएको प्रतिवेदनमा उल्लेख छ ।
उपमहानगरपालिकाले ४८ सामुदायिक विद्यालयका कक्षा ६ देखि १२ सम्म ३ हजार ३०६ छात्राका लागि सेनेटरी प्याड खरिद योजना अघि सारेको थियो । तर बोलपत्र प्रक्रियामा समस्या आएपछि विद्यालयलाईकै रकम निकासा गरी खरिद गराइएको हुँदा कार्यविधिको उल्लङ्घन भएको हो ।
विद्यालय आफैले खरिद गरेको प्याडको गुणस्तर, आकार तथा मापदण्ड पुष्टि गर्ने स्पष्ट प्रमाणपत्र पेश गरिएको छैन । यस कारण करिब १४ लाख १२ हजार २५७ रुपैयाँ बराबरको अतिरिक्त आर्थिक भार देखिएको महालेखाले प्रतिवेदनमा जनाएको छ ।
प्रतिवेदनमा खरिद प्रक्रिया समयमै सम्पन्न नगरी विद्यालयलाई रकम निकासा दिँदा पारदर्शिता कमजोर भएको र गुणस्तर नियन्त्रण प्रभावित भएको निष्कर्ष निकालिएको छ ।
यसअघि कपुरी न्युजले पटक पटक धरान उपमहानगरपालिकाद्धारा विद्यालयहरूलाई वितरण गरिएको सेनेटरी प्याड गुणस्तर हीन भएको बारेमा समाचार प्रकाशित गरेको थियो । सेनेटरी प्याड टेण्डर छलेर सुनियोजित रूपमा खरिदको आशङ्का सरोकारवालाले प्रकट गरेको समाचारमा उल्लेख थियो।
