धरान : नेपाली भाषाका आदिकवि भानुभक्त आचार्यको २१३ औँ जन्म जयन्ती धरानमा यसपाली पनि आज सोमवार भानु चौक स्थित भानुको शालिकमा माल्यार्पण गरी मनाइएको छ ।
नेपाली लेखक सङ्घ सुनसरीको आयोजनामा आज भानुचौकको शालिकमा मनाइएको भानु जयन्तीले ४९ औँ वर्ष पुरा गरेको छ । २०३४ सालमा कोशी अञ्चल मोटर सिण्डिकेटव्दारा भानुभक्तको शालिक स्थापना गरिएपछि चौकको नाम भानु चौक रहेको हो । त्यस अघि बजार अड्डा भनिन्थ्यो ।
धरान–२ का वडा अध्यक्ष रमेश राईको प्रमुख आतिथ्यमा भएको कार्यक्रममा उनले भानु जयन्तीलाई अब साहित्य, कला, सङ्गीतका स्रष्टाहरूले संयुक्त पर्व बनाउनु पर्ने बताए । सङ्गीतमय भानु जयन्तीलाई उपमहानगरपालिकाको नीति तथा कार्यक्रममा सामेल गर्न आफूले पहल गर्ने उनले प्रतिबद्धता जनाए ।
धरान विचार मञ्चका अध्यक्ष डा. आनन्द आचार्यले पृथ्वी नारायण शाहले राजनीतिक एकीकरण गरेको नेपाललाई भानुभक्तले भाषिक रूपमा एकीकरण गरेको बताए ।
सङ्घका सुनसरी अध्यक्ष हर्ष सुब्बाले भानुभक्तको योगदानको प्रेरणा र स्मरणलाई पुस्तान्तरण गर्न प्रत्येक वर्ष देश विदेशमा भानु जयन्ती मनाइने गरिएको बताए । उनले भने ‘अघिल्लो पुस्ताले त्यो दायित्व हामीलाई दिएर गए, हामीले नयाँ पुस्तालाई सुम्पिनु पर्दछ ।’
कार्यक्रम सञ्चालन सङ्घका सचिव विजय घिमिरेले गरेका थिए । बिहानै देखी पानी पर पनि भानुभक्तको शलिकमा माल्यार्पण गर्नका लागि कवि, साहित्यकार, बुद्धिजीवीहरू छाता ओढेर कार्यक्रममा सहभागी भएका थिए ।
