धरान : धरानको मुख्य बजार भानुचौक पूर्व देशी लाइन सडकमा दुई तर्फी सवारी चल्न दिने माग राखी व्यवसायीहरूले जारी राखेको बजार बन्द गरी सडक अवरोध खुलाउन प्रयास भइरहेको धरान उपमहानगरपालिका कावा प्रमुख अइन्दबिक्रम बेघाले बताएका छन् ।
उनका अनुसार आज बुधवार वडा अध्यक्ष रमेश राई, ट्राफिक प्रहरी प्रमुख र वडा प्रहरी प्रमुख सहितको छलफलमा मोटरसाइकलका लागि परीक्षण स्वरूप देशीलाईन सडक दुईतर्फी सञ्चालन गर्ने सहमति भएको थियो ।
कावा प्रमुख बेघाले भने ‘तर वडा अध्यक्ष ज्युसँग स्थानीय व्यवसायीको सामान्य विवाद भएपछि परिस्थिति बिग्रिएको हो ।’असन्तुष्ट व्यवसायीले सडक अवरुद्ध गरेकाले ऊनीहरूसँग वार्ता छलफल गर्न आफुले १२ पटक फोन गर्दा पनि कसैले फोन नउठाएको उनले बताए ।बेघाले भने, ‘अहिलेसम्म पनि समन्वयको प्रयास जारी छ, जायज माग पूरा गर्छौँ, तर अनुचित माग पूरा गर्न सक्दैनौ ।’ आन्दोलनरत पक्षलाई उपमहानगरपालिका परिसरमा बोलाएर समस्याको समाधान खोज्ने प्रयास भइरहेको उनको भनाई छ ।
सुनसरी उद्योग वाणिज्य सङ्घ सुनसरीका अध्यक्ष गोपाल श्रेष्ठले मोटरसाइकललाई दुईतर्फी सञ्चालन गर्न दिने निर्णय छलफलबाटै भएको बताए । उनले भने ‘हावातालमा निर्णय गरिएको होइन, तत्काल सबै सवारीका लागि सडक खुलाउँदा थप समस्या हुन सक्ने भएकाले परीक्षणका रूपमा मोटरसाइकललाई मात्रै अनुमति दिइएको हो ।’
उनका अनुसार विवाद समाधान गर्न व्यवसायी टेकेन्द्र श्रेष्ठसँग सम्पर्क भएको छ । कावा प्रमुख बेघा सहित बिहीबार छलफलमा बस्ने भएको श्रेष्ठले बताए । उनले भने ‘ उद्योग वाणिज्य सङ्घ देशी लाइनका व्यवसायीकै हितमा उभिएको छ, त्यसमा कार्यवाहक प्रमुख बेघा पनि सकारात्मक हुनुहुन्छ ।’
व्यवसायीहरूले भने प्रहरी प्रशासनले दमन गरेको र उद्योग वाणिज्य सङ्घले व्यवसायीको पक्षमा खुलेर नबोलेको आरोप लगाएका छन् । व्यवसायी भुपाल राईले व्यक्तिगत रूपमा कावा प्रमुखसँग सम्बन्ध राम्रो भए पनि अहिले आफू व्यवसायीको हैसियतमा आन्दोलनमा रहेको बताए ।
उनले भने ‘कावा प्रमुख नै आउनुपर्छ भन्ने छैन, वडा अध्यक्ष, वडा सदस्य वा कार्यपालिका सदस्य जो आए पनि हाम्रो माग सम्बोधन गर्न तयार भए आन्दोलन रोक्छौँ ।’ तर फोनबाट मात्र आन्दोलन नरोकिने, वार्ता गर्न फिल्डमै आउनुपर्ने, प्रहरी प्रशासन लगाएर धरपकड गर्ने काम गर्न नहुने व्यवसायीहरूको शर्त छ ।
