धरान: धरानलाई शिक्षा, स्वास्थ्यको क्षेत्रमा मात्र होइन, पर्यटकीय र व्यापारिक हब बनाउनुपर्छ भन्ने मत धेरै छ । धरानेहरुकै लगानीमा आधुनिक बनेको यो सहरको व्यापार व्यावसाय खस्कदै गएको धेरैले चिन्ता गर्ने गर्छन् । त्यसैले अब शिक्षा, स्वास्थ्य, पर्यटन र व्यापारको हब बनाउनुपर्छ भनेर बसह हुनगर्छ ।
तर, के धरान यी सबैको हब बन्न सक्छ ? धरानको मात्र होइन, प्रदेश १ कै महत्वकांक्षी मानिएको ६ लेनको जोगवनी किमाथांका सडक विस्तार भएर तरहरा आइसक्यो । यो सडक धरानको बीच बजार भएर जाने कि बाइपास गरेर लैजाने ? यसमा विवाद छ । बजार भएर लैजादा अहिले धरानको मुख्य बजार क्षेत्रको अस्तित्व नामेट हुन्छ । त्यसैले बजारबासीहरु यो सडकलाई बाइपास गरेर लैजान लविङ गरिरहेका छन् ।
शुक्रबार धरान ८ स्थित होटल गजुर प्यालेसको उद्घाटन गर्न आएका प्रदेश नं १ का आन्तरिक मामिला तथा कानुन मन्त्री हिक्मत कार्कीले त्यसरी सडक बाइपास गर्दा धरान हब नभएर ट्रान्जिट पोइन्ट मात्र रहनेतर्फ संकेत मात्र गरेनन्, धरानको बजार थप कमजोर हुने टिप्पणी पनि गरे । ‘धरानलाई ट्राञ्टिज पोइन्ट हुनबाट जोगाउनुपर्छ,’मन्त्री कार्कीले भने,‘६ लेन सडक बन्दैछ, बाइपास गर्नुभयो भने धरान बजार अझै कमजोर हुन्छ ।’
किमाथांका ट्रयाक खुलेपछि कायापलट हुने
मन्त्री कार्कीले चीनसँगको नाका किमाथांकासम्म ट्रयाक जोडिन अब मात्र २१ किलोमिटर बाँकी रहेको भन्दै २ बर्षभित्र ट्रयाक खोलिसक्ने दाबी गरे । त्यसपछि प्रदेश १ को समृद्धिको ढोका पनि खोलिने मन्त्री कार्कीको भनाई थियो । ‘किमाथांकय पारी विकसित सहर छ, अब ट्रयाक पुग्न २१ किलोमिटर मात्र बाँकी छ,’मन्त्री कार्कीले भने,‘२ बर्षपछि ट्रयाक खोलेपछि चीन र भारत जोडिन्छ । त्यहाँबाट आधा प्रतिशत मात्र घुम्न आउने हो भने पनि हामीलाई अरु केही चाहिदैन, पर्यटनलाई मात्र अघि बढाउदा हुन्छ ।’
धरानमा धेरै सम्भावनाहरु छन्
धरानमा धेरै सम्भावनाहरु भएको चर्चा गर्दै मन्त्री कार्कीले एकीकृतरुपमा विकासको खाकाको प्रस्ताव लिएर प्रदेश सरकारमा आउन धरानका जनप्रतिनिधिहरुलाई आग्रह गरेका थिए । धरानका शिक्षा, खेलकुद, स्वास्थ्य, पर्यटन, कला, सँस्कृति सबै क्षेत्रको उतिकै सम्भावना भएको भन्दै उनले एकीकृत योजना बनाएर धरानलाई गन्तव्यकोरुपमा विकास गर्नुपर्ने धारणा राखेका थए । ‘धरानलाई पोइन्ट हुनबाट जोगाउनुपर्छ, सबै क्षेत्रको एकीकृतरुपमा व्यवस्थित योजना बनाउनुपर्छ, त्यो योजनाको प्रदेश सरकारमा लिएर आउनुस्,’मन्त्री कार्कीले भने,‘हामीले पनि धरानमा खेलकुद र पर्यटनको कार्यालय खोल्नुपर्छ भन्ने सोच बनाएका छौ, यसले गविविधि गर्छ, सम्भावनाहरु धेरै छ ।’
