धरान: विगत दुई दशकदेखि धरानमा निरन्तर आयोजना हुदै आएको गोल्डकप यहाँ मात्र होइन, विदेशमा पनि आयोजना हुन्छ । सुन्दा, पत्यार नलाग्न सक्छ । तर, यो यथार्थ हो ।
धरानको बुढासुब्बा गोल्डकपको फ्रेच्चाइजकोरुपमा चीनको स्वशासित क्षेत्र हङकङ र बेलायतमा पनि हरेक बर्ष आयोजना भइरहेको छ । ती देशमा प्रतियोगिता आयोजना गर्न धरान फुटबल क्लबले लिखितरुपमा नै अनुमति दिएको छ । हङकङ आइडिमा पुगेका र आवासिय भिषा पाएर धरानेहरुको ठुलो संख्यामा बेलायत पुगेपछि विभिन्न स्थापना गरेको संस्थाहरुले बुढासुब्बाको अन्र्तराष्ट्रिय सँस्करण आयोजना गर्दै आएको छ । ‘क्लबले लिखितरुपमा अनुमति दिएर नै ती देशमा बुढासुब्बा गोल्डकप आयोजना हुदै आएको छ,’क्लबका महासचिव प्रताप तामाङले भने,‘यसले बुढासुब्बा गोल्डकपको गरिमा अन्तरराष्ट्रियस्तरमा पनि पुर्याएको छ ।’
धरान पछि बुढासुब्बा गोल्डकप हङकङमा आयोजना हुन थालेको थियो । त्यहाँ पनि धरान फुटबल क्लब नै गठन भएको छ । सोही क्लबको आयोजनामा बुढासुब्बा गोल्डकप हुन थालेको १५ बर्ष जति भइसकेको छ । बेलायतमा भने धरान समाज युकेको आयोजनामा बुढासुब्बा गोल्डकप हुने गरेको छ । ‘बेलायतमा हुन थालेको ८ बर्ष पुग्यो,’हाल धरान आएका धरान समाज युकेका खेलकुद विभाग प्रमुख निर्मल गुरुङले भने,‘नेपालका विभिन्न संघसंसथा, क्लबहरुले सहभागिता जनाउछन् ।’
ती देशमा बुढासुब्बा गोल्डकपको नाम मात्र होइन, ट्रफी पनि धरानमा विजेताले पाउने जस्तै नै छ । विजेतालाई नगद पनि पुरस्कार दिइन्छ । ‘बुढासुब्बाको इतिहासलाई यसले उचाईमा पुर्याएको छ, फ्रेन्चाइज जस्तै अर्को देशमा हुदा प्रचारप्रसार हुन्छ, माउ त धरानमा नै हुने हो नि,’महासचिव तामाङ भन्छन् । बुढासुब्बा गोल्डकप धरानमा २०५५ सालदेखि आयोजना हुन थालेको हो ।
नेपालमा आयोजना हुने विभिन्न गोल्डकपहरु आयोजना हुदै, बीचमा रोकिदै गए । बुढासुब्बा गोल्डकप भने कुनै पनि बर्ष रोकिएको छैन । ‘हामीले ज्यादै कठिन अवस्थामा पनि निरन्तरता दिएका छौ । देशमा ज्ञानेन्द्र शाहले शासन हत्याउदा चाडै कफ्र्यु लाग्थ्यो, खेलाडीहरुलाई सेनाले पक्रेर लग्यो, त्यस्तो बेला पनि गएर छुटायौ र आयोजना गर्यौ,’क्लबका अध्यक्ष किसोर राई भन्छन्,‘मधेश आन्दोलनले देश ठप्प हुदा पनि प्रतियोगिता रोकेनौ ।’
