 (13)_1727965004.gif)
धरानः नेपाल तामाङ घेदुङका पूर्वकेन्द्रीय सदस्य तथा पूर्व सुनसरी अध्यक्ष स्व. श्रीप्रसाद मोक्तान र पूर्व धरान नगर अध्यक्ष एवम् सल्लाहकार स्व. जयबहादुर मोक्तानको शोक सभामा तामाङ पत्रकारिता पुरस्कारको घोषणा गरिएको छ ।
नेपाल तामाङ घेदुङका केन्द्रीय सल्लाहकार सुजेन्द्र गोलेले सुनसरी घेदुङको प्रत्येक वार्षिक साधारण सभामा एकजना तामाङ पत्रकारलाई पुरस्कृत गर्न ५ हजार राशी रहेको श्रीप्रसाद–जयबहादुर तामाङ पत्रकारिता पुरस्कारको घोषणा गरेका हुन् । उनले नेपाल तामाङ घेदुङलाई सञ्चारमा पहुंच पुर्याउन र दिवंगत नेताद्धयको योगदानको उच्च मूल्यांकन गर्दै पत्रकारिता पुरस्कारको घोषणा गरिएको बताए । साथै, श्रीप्रसाद तथा जयबहादुरलाई तामाङ समुदायमा सदा अमर बनाई राख्न पत्रकारिता पुरस्कारको घोषणा गरिएको पनि बताए । घेदुङ संस्था र सहयोगी महानुभावहरुसंग समन्वय गरी पुरस्कार राशी वृद्धि गरिने समेत उनले बताए ।
शोक सभामा नेपाल तामाङ घेदुङका केन्द्रीय सल्लाहकार सुजेन्द्र गोले, नेपाल तामाङ यूवा घेदुङका पूर्व केन्द्रीय अध्यक्ष तत्कालीन सुनसरी सह–सचिव रविन गोले, नेपाल तामाङ घेदुङ सुनसरीका उपाध्यक्ष बुद्धिबहादुर घिसिङ, पूर्व धरान नगर अध्यक्ष तारा लामा, पूर्व इटहरी अध्यक्ष नरबहादुर मोक्तान, मोक्तान वंशावली खोज तथा अनुसन्धान तदर्थ समितिका सुनसरी अध्यक्ष शंकर मोक्तान, स्व. श्रीप्रसाद मोक्तानका छोरा कुमार मोक्तान(जोन) लगायतले स्वर्गीय नेताद्धयको योगदानको चर्चा गर्दै शोक मन्तव्य राखेका थिए ।
नेपाल तामाङ घेदुङ सुनसरीको आयोजना तथा मोक्तान वंशावली खोज तथा अनुसन्धान तदर्थ समितिका सुनसरीको व्यवस्थापनमा सम्पन्न कार्यक्रमको अध्यक्षता सुनसरी घेदुङका अध्यक्ष सुरज लामा पाख्रिनले गरेका थिए भने सञ्चालन सचिव मंगलसिंह मोक्तानले गरेका थिए । कार्यक्रममा नेपाल तामाङ घेदुङका केन्द्रीय सदस्य मैतबहादुर गोले, १ नं. प्रदेश उपाध्यक्ष रामबहादुर ग्यावा, सल्लाहकार लक्ष्मण मोक्तान, धरान नगर अध्यक्ष प्रेम वाइवा, बराह नगर अध्यक्ष कुलमान मोक्तान, नेपाल तामाङ महिला घेदुङ सुनसरीका अध्यक्ष विष्णु मोक्तान, पूर्व जिल्ला सचिव लक्ष्मी गोले, पाख्रिन समाजका अध्यक्ष हर्क लामा पाख्रिन, श्री हिमालय महायान् रिन्छेन् छ्योलिङ बुद्धिष्ट गुम्वा धरानका अध्यक्ष हर्क गोले, मृतकका परिवारहरु लगायतको उपस्थिति रहेको थियो ।
