इटहरी : नेपाल आदिवासी जनजाती महासंघका नेता तथा कार्यकर्तालाई प्रहरीले इटहरीबाट पक्राउ गरेको छ ।
लोकसेवा आयोगले खुलाएको विज्ञापनमा देशमा समावेशी सिद्धान्तको कोटा कम भएको भन्दै आदिवासी जनजाती महांसघले आज शनिबार प्रदेश १ मा बन्दको आह्वान गरेको थियो । आज शनिबार बिहानैदेखि इटहरी चौकमा आक्रमक बनेका महासंघका नेता तथा कार्यकर्तालाई प्रहरीले पक्राउ गरेको हो । इटहरीलाई केन्द्र बनाएर यातायात तथा यहाँको बजार बन्द गर्न महासंघले आह्वान गरेको थियो । इलाका प्रहरी कार्यालय इटहरीका प्रहरी नायव उपरीक्षक (डीएसी) समीरचन्द्र खरेलका अनुसार बन्द गराउन आह्वान गर्दै हिडेकाले पक्राउ गरिएको बताए ।

‘बजार बन्द गराउँदै हिडेँकाले हामीले १५ जनालाई पक्राउ गरेका छौँ,’ खरेलले टेलिफोन सम्पर्कमा भने, ‘अहिले यातायात पनि सञ्चालनमा छ, अवस्था सामान्य रहेको छ ।’ उनका अनुसार आदिबासी जनजाती महासंघ सुनसरीका अध्यक्ष रामकुमार राई सहित १५ जनालाई पक्राउ गरी ईलाका प्रहरी कार्यालय इटहरीमा राखिएको छ । डीएसपी खरेलले भने, ‘बजार बन्द गर्नुपर्छ भन्दै हिडेँको सूचनाका आधारमा हामीले पक्राउ गरेका हौँ, थप अनुसन्धान भईरहेको छ ।’

आदिबासी जनजाती महासंघका प्रदेश १ अध्यक्ष धुब्र लिम्बुले आन्दोलन गर्नु कुनै रहर नभएको र आँफूहरु बाध्यताका कारण आन्दोलनमा उत्रनुपरेको बताउँदै आएका छन् । हिजो शुक्रबार महासंघले इटहरीको मुख्य चौकमा संघीय मामिला तथा सामान्य प्रशासन मन्त्री लालबाबु पण्डित र लोकसेवा आयोगका अध्यक्ष उमेश मैनालीको पुत्ला समेत दहन गरेको थियो ।