काठमाण्डौं : निर्वाचन आयोगले स्थानीय तहको उप निर्वाचनका लागि मनोनयन दर्ता गराएका उम्मेदवारमाथि परेको उजुरी उपर आज जाँचबुझ गर्ने भएको छ ।

बिहान ११ बजेदेखि साढे १ बजेसम्म उजुरी उपर जाँचबुझ ५ बजे नामावली प्रकाशन गर्ने आयोगका प्रवक्ता राजकुमार श्रेष्ठले बताए । आगामी मंसिर १४ गते हुने स्थानीय तहको उपनिर्वाचनमा ३५ जिल्लाका ४४ स्थानीय तहमा ४८ पदका लागि २ सय ८१ जनाको मनोनयन दर्ता भएको छ । त्यसमध्ये २ जनाविरुद्ध मात्रै उजुरी परेको आयोगका प्रवक्ता श्रेष्ठले जानकारी दिए ।

कपिलवस्तुको शिवराज नगरपालिका १० को वडा अध्यक्ष पदमा कांग्रेसका उम्मेदवार देवराज भारतीको विरोधमा स्वतन्त्र उम्मेदवार शिवभक्त ठाकुरले उजुरी दर्ता गराएका छन् भने पाँचथरको फिदिम नगरपालिका १ को वडाध्यक्ष पदमा राष्ट्रिय प्रजातन्त्र पार्टी (लोकतान्त्रिक)का उम्मेदवार जानुका थाम्सुहाङका विरुद्ध राष्ट्रिय प्रजातन्त्र पार्टीका उम्मेदवार मिलन गिरीले उजुरी दर्ता गराएको निर्वाचन आयोगले जनाएको छ ।

आयोगले भोलि शनिबार दिउँसो साढे १ बजेसम्म उम्मेदवारले नाम फिर्ता लिन सक्ने समय तय गरेको छ भने भोलि ५ बजे उम्मेदवारको अन्तिम नामावली प्रकाशन गर्ने आयोगका प्रवक्ता श्रेष्ठले बताए । आयोगले मंसिर १ गते स्थानीय तहका उम्मेदवारलाई निर्वाचन चिन्ह प्रदान गर्ने छ ।