काठमाडौँ: लामो रस्साकस्सी पछि सत्तारुढ दल नेकपाले प्रतिनिधिसभाको सभामुख पदमा नेता अग्नी प्रसाद सापकोटालाई उम्मेदवार बनाउने निर्णय गरेको छ ।

प्रधानमन्त्री निवास बालुवाटारमा आज आइतबार साँझ बसेको नेकपा सचिवालय बैठकले सापकोटालाई सभामुखको उम्मेदवार बनाउने निर्णय गरेको हो । आजै बिहान अध्यक्षद्वय केपी शर्मा ओली र पुष्पकमल दाहाल प्रचण्डबीच पनि सापकोटालाई सभामुख बनाउने सहमति भएको थियो । सोही सहमतिलाई सचिवालय बैठकले निर्णय गर्दै अनुमोदन गरेको हो ।

संसद सचिवालयकी एक महिला कर्मचारीलाई दुव्र्यवहार तथा कुटपिट गरेको आरोप लागेपनि तत्कालीन सभामुख कृष्ण बहादुर महराले राजिनामा दिएका थिए । उनको राजिनामा पछि सभामुख पद रिक्त रहेको छ । सभामुख पदमा उपसभामुख शिवमाया तुम्बाहाम्फेले पनि दाबी गरेकी थिइन् । तर, पार्टीले भने उनलाई उपसभामुखबाट पनि राजिनामा दिन निर्देशन दिएको थियो । सभामुख र उपसभामुख एउटै पार्टीबाट नहुने भएकोले उनलाई राजिनामा दिन भनिएको थियो । सभामुख चयन विवादकै कारण पुस ४ गतेबाट सुरु भएको प्रतिनिधि सभाको बैठक पुस ११, १६ र २७ गते सुचना टाँस गरेर स्थगित भएको थियो । प्रतिनिधिसभाको अर्को बैठक भोली माघ ६ गतेलाई बोलाइएको छ ।