 (13)_1727965004.gif)
विराटनगर : सम्झौता बमोजिम बीमा रकम भुक्तानी नगरेको भन्दै नेपाल पत्रकार महासङ्घ मोरङ शाखाले उच्च अदालत विराटनगरमा रिट दायर गरेको छ । सोमबार महासङ्घ मोरङ शाखाको तर्फबाट सचिव नेत्र पी अधिकारीले उच्च अदालतमा रिट निवेदन दायर गरेका हुन् ।
नेपाल पत्रकार महासङ्घ र अजोड इन्स्योरेन्स कम्पनीबिच द्विपक्षीय सम्झौता भई मोरङका २०० जना बढी पत्रकार र उनीहरूका परिवारका सदस्यहरूको बीमा गरिएको थियो । त्यसमध्ये ५१ जना बिमितहरुमा कोरोना सङ्क्रमण भएकोमा २० जनाले मात्र बिमा दाबी भुक्तानी पाएका थिए । बाँकी ३१ जनाले बिमा दाबी भुक्तानी नपाएको र भुक्तानी दाबी माग गरेको १० महिना बितिसक्दा पनि कम्पनीले भुक्तानी दिनुको साटो भुक्तानी दिन नसक्ने ब्यहोराको पत्र पठाएको थियो ।
अजोड इन्स्योरेन्सले जारी गरेको बिमालेख तोकिएको अवधिसम्म कुनै पनि हालतमा खारेज गर्न नसकिने, पिसिआर टेस्ट पोजेटिभ देखिएमा सङ्क्रमित व्यक्तिलाई १ लाख सम्मको दाबी भुक्तानी दिने, बिमितको मृत्यु भएमा इच्छाइएको व्यक्तिलाई भुक्तानी गर्ने र बिमितले रितपूर्वक निवेदन दिएको सात दिनभित्र रकम भुक्तानी दिने सम्झौता गरेको छ ।
तर कम्पनीले सात दिनभित्र भुक्तानी दिइसक्नु पर्ने रकम १० महिना बितिसक्दा पनि दिएको छैन । त्यसअघि नेपाल पत्रकार महासङ्घले बिमा रकम भुक्तानी नहुनुको कारण माग गर्दै पत्राचार गरेको थियो । त्यसमा जवाफमा नेपाल सरकारसँग रकम माग गरेको र सरकारले उपलब्ध गराएपछि मात्र भुक्तानी दिन सक्ने ब्यहोराको जवाफ दिएको थियो ।
कम्पनीको नियम अनुसार आवश्यक प्रिमियम तिरेर बीमा गरेका बिमितहरुलाई भुक्तानी दिन नसकिने भन्ने गैर जिम्मेवार जवाफ दिएपछि नेपाल पत्रकार महासङ्घले उच्च अदालत विराटनगरमा परमादेश माग गर्दै रिट दायर गरेको हो ।
रिट निवेदनमा अजोड इन्सोरेन्ससँग बीमा सम्झौता गर्दा कोरोना मापदण्ड २०७७ बमोजिम दाबी भुक्तानीका लागि बिमकलाई आदेश निर्देशन दिने तथा नेपाल सरकारसँग समन्वय गरिदिने जिम्मेवारी भएको बिमा समिति, सरकारको नीति एबै प्रतिबद्धता बमोजिम समयमा आवश्यक रकम बन्दोबस्त गरिदिने जिम्मेवारी भएको अर्थ मन्त्रालय र नेपाल सरकार मन्त्रिपरिषद्को कार्यालय समेतलाई विपक्षी बनाइएको छ।
विपक्षीले कानुन बमोजिम भुक्तानी दिनुपर्ने रकम रोकेर राखी निवेदकहरूको संवैधानिक एवं कानुनी हक अधिकारमा आघात पु¥आउने काम गरेकोले नेपालको संविधानको धारा १८ र बीमा ऐन २०४९ को दफा ८ तथा कोरोना बिमा मापदण्ड २०७७ को दफा ११, १६(३), (४) र (५) बमोजिम बिमितहरुले बिमाङ्क रकम पाउने अधिकार हनन भएको रिट निवेदनमा उल्लेख छ ।
निवेदनमा जिम्मेवार पक्षले रकम निकासा, आदेश, निर्देशन वा भुक्तानीसमेत जे जे गर्नुपर्ने हो गर्ने गरी दाबी रकम भुक्तानी दिनु भनी विपक्षीको नाममा परमादेश लगायतको आदेश जारी गर्न माग गरिएको छ ।
नेपाल सरकारले आर्थिक वर्ष २०७७/७८ को नीति तथा कार्यक्रम र बजेटमा कोरोना बिमा गर्नका लागि प्रिमियमको आधार रकम भुक्तानी गरिदिने घोषणा गरेपछि लाखौँ नागरिकले कोरोना बीमा गराएका थिए । त्यसमध्ये एक लाख भन्दा बढीले बिमा रकम दाबी गर्दै भुक्तानी मागेका थिए । अहिलेसम्म झण्डै ३५ हजार सङ्क्रमितले बिमा दाबी भुक्तानी लिइसकेका छन् । अहिले पनि देशभर ७० हजार भन्दा बढीले बिमा रकम भुक्तानी पाउन सकेका छैनन् ।
