 (13)_1727965004.gif)
धरान : नेवार समुदायको जातीय सङ्गठन नेवा : देय दबूँको धरान उपमहानगर अध्यक्षमा पुनः मनोहर शाक्य निर्वाचित भएका छन् ।
धुलिखेल समाजको भवनमा शुक्रवार भएको तेस्रो नगर अधिवेशनले उनलाई दोस्रो कार्यकालका लागि पुनः अध्यक्ष निर्वाचित गरेको हो ।
अधिवेशनमा प्रमुख अतिथि धरानका मेयर तिलक राईले बहुजातिय सहर धरानको विकासमा आदिवासी जनजातिहरूबाट संस्थागत रूपमा महत्त्वपूर्ण योगदान पुग्दै आएको बताउँदै भने ‘यसमा नेवा देय दबूँको योगदान उल्लेखनीय भएको बताए । दबूँले भाषा, संस्कृतिको संरक्षणमा देखाउँदै आएको सक्रियताले धरानलाई विविध संस्कृतिको सहरको रूपमा परिचय गराउन योगदान पुगेको उनले बताए । धरानको पहिचान विविध जातीय संस्कृति भएकाले जातीय संस्थाहरू अझ सक्रिय बन्दै जानुपर्नेमा मेयर राईले जोड दिए ।
अधिवेशनले मनोहरको नेतृत्वमा सर्वसम्मतिबाट चयन गरेको कार्यसमितिमा वरिष्ठ उपाध्यक्ष अमृत श्रेष्ठ, उपाध्यक्ष प्रदीप कुमार श्रेष्ठ र सल्मा जोशी, सचिव विनीता बज्राचार्य र दीपेन्द्र श्रेष्ठ, कोषाध्यक्ष सुवर्णमोहन श्रेष्ठ रहेका छन् । सदस्यहरूमा यशोदा कायस्थ, सुजता श्रेष्ठ, अनेश कुमार तुलाधर, लीला बहादुर प्रधान, हेमा श्रेष्ठ, अभिमन्यु श्रेष्ठ र हरिकृष्ण श्रेष्ठ रहेका छन् ।
नेवा: देय दबूँ नेवार समुदायको देशभरिका जिल्लाहरूमा शाखा सञ्जाल भएको सङ्गठन हो । नेवार समुदायको भाषा, संस्कृति, इतिहासको क्षेत्रमा दबूँले विभिन्न कार्यक्रम गर्दै आएको छ । पुनः निर्वाचित अध्यक्ष शाक्यले दबूँ नयाँ पुस्तामा नेवा ः भाषा, संस्कृतिको हस्तान्तरण गर्न दबूँको स्थापना भएको बताए । उनले अघिल्ला कार्यकालमा दबूँले धरानमा नेवाहरूको इतिहास, परिचय,पहिचान र विकासको लागि महत्त्वपूर्ण कार्यक्रम सम्पन्न गरेको उल्लेख गरे ।
केन्द्रीय सदस्य अनिल मास्केले दबूँको राष्ट्रिय अधिवेशन आउँदो चैत महिनामा धरानमा आयोजना गरिने केन्द्रीय समितिले निर्णय गरेका जानकारी गराउँदै त्यसको तयारीका लागि जुट्न धरानका नेवार समुदायलाई आव्हान गरे । अधिवेशनमा धरानका नेवा: समुदायका सांस्कृतिक समूहहरू खल: पुचका अध्यक्ष, धरान स्थित आदिवासी जनजाति जातीय सङ्गठनका पदाधिकारीहरूको उपस्थिति थियो ।
