दमक : दमक नगरपालिकाले आगामी आर्थिक वर्ष २०७९/८० का लागी १ अर्ब ६३ करोड ४० लाख ४० हजार रुपैयाँको बजेट नगरसभामा पेस गरेको छ । नगर उपप्रमुख रेगिना भट्टराईले नगरसभामा ५१ प्रतिशत चालु खर्चमा र ४९ प्रतिशत पुँजीगत खर्च सहितको बजेट प्रस्तुत गरेकी हुन ।

आगामी आर्थिक वर्षको बजेट सहित नीति तथा कार्यक्रम नगरसभामा प्रस्तुत गर्दै नगर उपप्रमुख भट्टराईले यस पटक केही लोकप्रिय कार्यक्रम समावेश गरेकी छिन । एक वर्षमा १ हजार विपन्न नागरिकलाई निःशुल्क स्वास्थ्य बिमा गराउने, अति विपन्न नागरिकको स्वास्थ्य बिमा गर्नका लागि 'तपाईँको स्वास्थ्य हाम्रो जिम्मेवारी' कार्यक्रम सञ्चालन गरिने, गरिबी न्यूनीकरणका लागि विपन्नता पहिचान कार्यविधिका आधारमा सहुलियत कार्ड उपलब्ध गराइने, कार्ड मार्फत शिक्षा, स्वास्थ्य र खाद्यान्नमा सहुलियत प्रदान गरिने लगायतका लोकप्रिय कार्यक्रमलाई नीति तथा कार्यक्रममा समावेश गरिएको छ । 
त्यसैगरी असहाय नागरिकको जीवन रक्षाका लागी "सबैका लागि सबै, कोही एक्लो छैन' कार्यक्रम, महिलालाई स्वरोजगार बनाउन 'दमकका नारी विकासमा बराबरी’' कार्यक्रम सञ्चालन, ७५ वर्ष माथिका नागरिकको घरमै स्वास्थ्य परीक्षण गर्ने, दमक नगरभित्रका सुत्केरी, ५ वर्षमुनिका बालबालिकालाई रगत चढाउनु परेमा ल्याब परीक्षण गरेबापत लाग्ने रकमलाई शोधभर्ना गरी निःशुल्क गरिने, सेवा निवृत्त हुने महिला स्वास्थ्य स्वयं सेविकाले यस अघि पाउँदै आएको एकमुष्ट ६० हजार रुपैयाँ रकम बढाएर ८० हजार रुपैयाँ पुर्याउने लगायतको जनमुखी र लोकप्रिय कार्यक्रम यस पटको बजेटमा समावेश गरिएको नीति तथा कार्यक्रम नगर उपप्रमुख भट्टराईले सार्वजनिक गरेकी हुन । 
बजेटले नगरपालिकाको सुशासन, आर्थिक समृद्धि, लैङ्गिक समानता, समावेशीकरण, न्यायपूर्ण, सन्तुलित र दिगो पूर्वाधार विकासको परिकल्पना गरेको छ ।
प्रस्तुत, नीति तथा कार्यक्रम एवं बजेटका सम्बन्धमा नगरसभाका सदस्यहरूलाई असार २० गते सम्ममा नगर प्रमुखलाई सुझाव पेस गरिसक्न अनुरोध गरिएको छ । त्यसपछि एघारौँ नगरसभाको दोस्रो बैठक असार २७ गते बस्ने नगर प्रमुख राम कुमार थापाले जानकारी दिए ।