 (13)_1727965004.gif)
विराटनगर : प्रदेश नंं. १ को नामकरणका लागि शुक्रवार मुख्यमन्त्री तथा मन्त्रिपरिषद्को कार्यालयमा सर्वदलीय बैठक सम्पन्न भएको छ । प्रदेश सरकारको आह्वानमा प्रदेश सभाका संसदीय दलका नेतासहितको बैठक मुख्यमन्त्रीको कार्यकक्षमा बसेको हो ।
बैठक चालु प्रदेश सभाबाट प्रदेशको नामकरण टुङ्गाउने विषयमा बसेको मुख्यमन्त्री राजेन्द्रकुमार राईले बताए । बैठकमा प्रमुख प्रतिपक्ष दल नेकपा एमाले संसदीय दलका नेता भीम आचार्य, नेपाली काँग्रेसका संसदीय दलका नेता राजीव कोइराला, नेकपा माओवादी केन्द्रका संसदीय दलका नेता एवं आर्थिक मामिला तथा योजना मन्त्री इन्द्रबहादुर आङ्बो, जनता समाजवादी पार्टी नेपालका संसदीय दलका नेता एवं स्वास्थ्य मन्त्री जयराम यादव, सङ्घीय लोकतान्त्रिक राष्ट्रिय मञ्च संसदीय दलकी नेता एवं सामाजिक विकास राज्यमन्त्री विष्णु तुम्बाहाम्फे, राष्ट्रिय प्रजातन्त्र पार्टी संसदीय दलकी नेता इन्दिरा राईको उपस्थिति थियो । त्यस्तै नेपाली काँग्रेस संसदीय दलका प्रमुख सचेतक सुयर्माराज राई, नेकपा एमालेका हिक्मतकुमार कार्की पनि बैठकमा सहभागी थिए ।
बैठकमा प्रदेश सभाको चालु अधिवेशनबाटै प्रदेशको नाम टुङ्गो लगाउने विषयमा दलहरूबिच प्रारम्भिक कुराकानी भएको मुख्यमन्त्री राजेन्द्रकुमार राईले बताए । प्रारम्भिक चरणको बैठक भएकाले आ-आफ्नो दलका तर्फबाट धारणाहरू प्रस्तुत गर्ने काम भएको उनले बताए । ‘सुरुवाती जस्तो बैठक भएकाले अहिले दलहरूका तर्फबाट प्रारम्भिक धारणा आएको छ ।
'प्रदेश नामकरणका विषयमा सबै दलले लचकता अपनाउने र साझा सहमति खोज्ने कुरा भएको छ’ मुख्यमन्त्री राईले सर्वदलीय बैठकमा भएका कुराकानी उल्लेख गर्दै भने । शुक्रवारको बैठकमा सबै दलका तर्फबाट प्रदेशको नाम के राख्न चाहेको हो त्यो प्रस्तुत भएको मुख्यमन्त्री राईले बताए ।
दलहरूबाट प्रदेशको नामकरणका सवालमा अलगअलग नाम आएकाले आगामी बैठकमा वैकल्पिक नाम सहित उपस्थित हुने सहमति भएको मुख्यमन्त्री राईले बताए । आ-आफ्नो पार्टीबाट अब थप म्यान्डेटका साथ उपस्थित हुने गरी अर्को बैठक बस्ने सहमति सहित शुक्रवारको बैठक समापन भएको मुख्यमन्त्री राईले जानकारी दिए ।
