धरान : उपमहानगरपालिकाको वडा नं. ५ देउरालीमा आज बिहान खोलाको सार्वजनिक जग्गा अतिक्रमण गरेर निर्माण गरिएको घर भत्काइएको छ ।
धरान-५ को खार खोला र अधेरी खोलाको सङ्गम स्थल धरान उपमहानगरपालिकाले बहुजातिय रङ्गशाला बनाउने निर्णय गरेको क्षेत्रमा एक तले पक्की घर निर्माण गरिएको थियो । सार्वजनिक जग्गा अतिक्रमण गरी घर निर्माण गरिएको भन्दै धरान उपमहानगरपालिकाले पटक पटक नबनाउन भन्दै आग्रह गर्दै पत्राचार समेत गर्दा पनि अटेर गरी घर निर्माण सम्पन्न भएको थियो ।
मुना चौधरी लिम्बुले सार्वजनिक जग्गा अतिक्रमण गरी एक तले पक्की घर निर्माण गरेको भन्दै नगरपालिकाले आज बिहान ठुलो सङ्ख्यामा सुरक्षाकर्मी परिचालन गरी डोजर लगाएर घर भत्काएको हो ।
घर भत्काउने क्रममा दोहोरो झडप समेत भएको थियो । दोहोरो झडप हुँदा धरान उपमहानगरपालिकाको डोजरमा क्षति पुगेको छ । डोजरको सिसा फुटेका छन् भने केही सामान्य घाइते भएका छन् ।
धरान उपमहानगरपालिकाले संरक्षण गरी बहुजातिय रङ्गशाला बनाउने भनेको स्थानमा अनधिकृत बसोबास बस्न थालेकोले र पटक पटक आग्रह गर्दा पनि अटेर गरेर घर निर्माण सम्पन्न गरेकोले भत्काउनुपरेको धरान उपमहानगरपालिकाका नगर प्रहरी प्रमुख विष्णु कोइरालाले बताए ।
पछिल्लो समय धरानमा सार्वजनिक जग्गा अतिक्रमण गर्ने कार्य तीव्र गतिमा बढिरहेकोले धरान उपमहानगरपालिका एक्सनमा उत्रिएको हो ।
_1664681437.jpg)
