 (13)_1727965004.gif)
सुनसरी : उच्च शिक्षालय तथा माध्यमिक विद्यालय सङ्घ नेपाल हिसान सुनसरीको स्पोर्ट्स मिट २०७९ अन्तर्गत हिसान भलिबलको उपाधि बिश्वआदर्श कलेजले जितेको छ ।
इटहरीमा आज सोमबार सम्पन्न फाइनल खेलमा छात्र छात्रा दुवै विधामा बिश्वआदर्शले उपाधि जितेको हो । छात्रतर्फको उपाधि हात पार्ने क्रममा इटहरीको बिश्वआदर्शले धरानको मेघा हिमालयन कलेजलाई २५-१७, २५-२० र २६-२४ को सोझो सेटले पराजित गर्दै उपाधि जितेको हो ।
सो प्रतियोगितामा उत्कृष्ट खेलाडी विश्व आदर्शका इमरान शेख घोषित भए । वेस्ट स्पाइकर मेघा हिमालयनका अनुप राई, वेस्ट लिब्रो सोनेहांग राई भए । बिश्वआदर्शका सुबिन गुरुङ वेस्ट सेटर, करण मल्लिक वेस्ट सर्भर, भुवन खड्का वेस्ट ब्लकर घोषित भए ।
सोमबार नै सम्पन्न छात्रातर्फको उपाधि हात पार्ने क्रममा बिश्वआदर्शले पूर्वाञ्चल सेकेण्डरी स्कुल तरहरालाई २५-१३, २५-१८ र २५-१६ को सोझो सेटले पराजित गरेको छ । उक्त प्रतियोगितामा बिश्वआदर्शकी सृजना कटुवाल उत्कृष्ट खेलाडी घोषित भइन । रोजिना मगर वेस्ट सर्भर र प्रीति चौधरी वेस्ट स्पाइकर भए ।
पूर्वाञ्चलकी अनिषा राना मगर वेस्ट डिफेन्स, एलिसा चौधरी वेस्ट ब्लकर र रोशिका चौधरी वेस्ट सेटर घोषित भए । माघ ७ गते देखी सुरु भएको प्रतियोगितामा हिसान सुनसरीमा आबद्ध एक दर्जन बढी उच्च शिक्षालयको सहभागिता रहेको थियो । विजेता तथा उपविजेता बिद्यार्थीहरुलाई हिसान सुनसरी अध्यक्ष सागरप्रसाद भट्टराई, हिसान स्पोर्ट्स मिट संयोजक हेमन्त भण्डारी, बिश्वआदर्श कलेजका प्राचार्य गणेश दुलाल लगायतले शिल्ड तथा प्रमाणपत्र वितरण गरेको ।
स्पोर्ट्स मिट अन्तर्गत फुटबल र क्रिकेटका समूह चरणका खेलहरू भइरहेका छन् ।
