सुनसरी : उच्च शिक्षालय तथा माध्यमिक विद्यालय सङ्घ नेपाल हिसान सुनसरीको स्पोर्ट्स मिट २०७९ अन्तर्गत हिसान फुटबलको उपाधि धरान मेघा हिमालयन कलेजले जितेको छ। इटहरीमा आज शुक्रवार सम्पन्न फाइनल खेलमा ज्ञान दर्पण स्कुल इटहरीलाई ४-० गोलको फराकिलो अन्तरले पराजित गर्दै धरान मेघाले उपाधि जितेको हो ।
इटहरी रङ्गशालामा सम्पन्न फाइनल खेलमा धरान मेघालाई उपाधि जिताउन शेखर कुवरले २ तथा अङ्कित थापा र सुगम जीमीले एक एक गोल गरे । फाइनल खेलको म्यानअफ द म्याच धरान मेघाका सुगम जीमी घोषित भए । प्रतियोगिताको सर्वोत्कृष्ट खेलाडी धरान मेघाकै सुभाष मगर, करण कामत बेष्ट डिफेन्स, राजीव खड्का बेष्ट गोल किपर, शेखर कुवर बेष्ट फरवार्ड, हेम गुरुङ बेष्ट कोच घोषित भए । ज्ञान दर्पण इटहरीका रोदन राई बेष्ट मिडफिल्डर र हाइस्कोरर धरान मेघाका अङ्कित थापा र शेखर कुवंर घोषित भए । उनीहरू दुवै जनाले प्रतियोगितामा ६-६ गोल गरेका थिए ।
यस्तै शुक्रवार नै सम्पन्न भएको तेस्रो स्थानको खेलमा नमुना कलेज इटहरीले कस्तुरी कलेजलाई ३-० गोल अन्तरले पराजित गरेको छ । यस्तै हिसान आबद्ध स्कुल स्तरीय स्पोर्ट्स मिट अन्तर्गतकै फुटबलको उपाधि लर्डबुद्ध स्कुल झुम्का च्याम्पियन बनेको छ । इटहरी रङ्गशालामै शुक्रवार सम्पन्न फाइनलमा कोसी सेन्टजेम्स स्कुल इटहरीलाई सडेन डेथमा पराजित गर्दै च्याम्पियन बनेको हो ।
विजेता तथा उपविजेता खेलाडीहरूलाई एन्फा मानार्थ वरिष्ठ उपाध्यक्ष किशोर राई, सुनसरी अध्यक्ष नवीन राई, हिसान केन्द्रीय सदस्य बलराम पन्त, सुनसरी अध्यक्ष सागरप्रसाद भट्टराई लगायतले शिल्ड तथा प्रमाणपत्र वितरण गरे । माघ ७ गते देखी सुरु भएको प्रतियोगितामा हिसान सुनसरीमा आबद्ध दुई दर्जन शिक्षालयको सहभागिता रहेको थियो ।