इटहरी : जिल्ला प्रशासन कार्यालय सुनसरीले चर्को ध्वनि निकाल्ने गतिविधि नगर्न आग्रह गरेको छ । फाल्गुन १२ गते जिल्लावासीमा अनुरोध गर्दै प्रमुख जिल्ला अधिकारी हुमकला पाण्डेले ध्वनि प्रदूषण रोक्न आग्रह गरेकी हुन् ।
"जिल्लाभित्र धार्मिक तथा सांस्कृतिक रूपमा मनाइने एवं सञ्चालन गरिने विवाह, मेला, महोत्सव, जात्रा, सप्ताह पुराणलगायतका कार्यक्रमहरूबाट ध्वनि प्रदूषण हुन गई दैनिक जीवनयापन, अध्ययन, अध्यापन, अस्पतालको सेवा प्रवाह लगायतमा असर परेको भन्ने जनगुनासोहरू प्राप्त हुन आएकोले यस्ता खालका गतिविधि गर्दा ध्वनि प्रदूषण नहुने तरिकाले कार्यक्रमहरू सञ्चालन गर्नु, गराउनु हुन जिल्लावासी सम्पूर्णमा यसै सूचनामार्फत अनुरोध गरिन्छ," पत्रमा उल्लेख गरिएको छ ।
अभियानमा स्थानीय प्रशासनलाई सहयोग गर्ने अपेक्षा सहित अनुरोध गरिएको छ । बढ्दो ध्वनि प्रदूषणको कारण सहरी क्षेत्रमा कोलाहल बढेको गुनासो बढ्दै गएको छ ।
