वराहक्षेत्र : वराहक्षेत्र नगरपालिकामा जारी वडा स्तरीय वराहक्षेत्र मेयर लिग कप रनिङ शिल्ड फुटबल प्रतियोगिता अन्तरगत बिहीबार भएको पहिलो खेलमा वडा नं.२ विजयी भएको छ ।
वडा नं.६ लाई शून्यका विरुद्ध १ गोलको अन्तरले पराजित गर्दै वडा नं.२ ले ३ अङ्क प्राप्त गरेको छ। लगातार दोस्रो जित दर्ता गरेको २ ले प्रतियोगितामा ६ अङ्क पुर्याएको छ ।
वडा नं.२ ले उपहार गोल मार्फत वडा नं.६ विरुद्ध खेलको दोस्रो हाफको २८ मिनेटमा अग्रता लिएको थियो । वडा नं.६ का खेलाडीले आफ्नै पोस्टमा आत्मघाती गोल गरेका थिए ।
निकै प्रतिस्पर्धात्मक बनेको खेलमा त्यस पछि दुवै टिमबाट कुनै गोल हुन नसके पछि वडा नं.२ शून्यका विरुद्ध एक गोलको अन्तरले विजयी भएको थियो ।
खेलमा वडा नं.६ का गोलरक्षक आयुश बजगाईँ म्यान अफ द म्याच घोषित भए । उनले नगद २ हजार १ सय सहित ट्रफि प्राप्त गरेका थिए ।
त्यस्तै बिहीबार नै भएको दोस्रो खेलमा वडा नं.१० विजयी भएको छ । वडा नं.३ लाई शून्यका विरुद्ध १ गोलको अन्तरले पराजित गर्दै वडा नं.१० ले प्रतियोगितामा महत्त्वपूर्ण ३ अङ्क जोडन सफल भएको छ ।
पहिलो खेलमा बराबरी खेल्दै १ अङ्क प्राप्त गरेको वडा नं.१० ले प्रतियोगितामा ४ अङ्क पुर्याएको छ । खेलको दोस्रो हाफको २५ मिनेटमा वडा नं.१० का सनम मगरले गरेको गोल नै निर्णायक बनेको थियो ।
निकै प्रतिस्पर्धात्मक बनेको खेलमा त्यस पछि कुनै गोल हुन नसकेपछि वडा नं.१० ले वडा नं.३ विरुद्ध संर्घषपुर्ण जित निकाल्न सफल बन्यो ।
खेलमा निर्णायक गोल गरेका सनम मगर म्यान अफ द म्याच घोषित भए । उनले नगद २ हजार १ सय सहित ट्रफि प्राप्त गरेका थिए ।
प्रतियोगितामा शुक्रवार पहिलो खेल वडा नं ४ र वडा नं.८ तथा दोस्रो खेल वडा नं ५ र वडा नं.११ का बिच हुनेछ।
