धरान : कोशी नाम खारेजी, पूनः नामकरण आन्दोलनको बारेमा प्रदेश सरकार र प्रदेश सभाले वैशाख १० गते भित्र सम्बोधन नगरेमा ११ देखी १४ गते सम्म विराटनगर केन्द्रित आन्दोलन गरिने भएको छ ।
प्रदेश १ पुनः नामाङ्कन संयुक्त सङ्घर्ष समितिको शुक्रवार बैठकको बैकले उक्त निर्णय गरेको हो । बैठकमा सहभागी प्रमुख घटक सङ्घीय लोकतान्त्रिक राष्ट्रिय मञ्चका सुनसरी जिल्ला अध्यक्ष अमर इजमले भर्चुअल बैठकले उक्त निर्णय गरेको बताए ।
यसअघि सङ्घर्ष समितिले प्रदेश सरकार र प्रदेश सभालाई वैशाख १० सम्मको अल्टिमेटम दिएको छ । उक्त अल्टिमेटमलाई पुनः स्मरण पत्र दिने निर्णय पनि भएको छ ।
वैशाख १० सम्म जिल्लाहरूमा क्षेत्रीय आमसभा गर्ने त्यस अवधिमा पनि आन्दोलनलाई सम्बोधन नगरिए वैशाख ११ देखी १४ सम्म विराटनगर केन्द्रित आन्दोलन गर्ने निर्णय भएको हो ।
इजमका अनुसार बैठकले सहिद पदम लिम्बु लाजेहाङको शवलाई वैशाख १५ गते भित्र ससम्मान अन्त्येष्टि गर्ने निर्णय पनि गरेको छ । त्यस अघि विराटनगर केन्द्रित दबाब आन्दोलन सशक्त बनाउने कार्यक्रम तर्जुमा गरिने छ ।
आन्दोलनलाई थप प्रभावकारी र व्यवस्थित बनाउन ‘पहिचानको लागि युवा’ यूथ फर आइडेन्टिटि नामक युवा समूह गठन र परिचालनलाई तीव्रता दिने निर्णय पनि बैठकले गरेको छ ।
