_1749430366.gif)
- शिशिर खड्का
धरान : कोशी प्रदेश सभाको बजेट अधिवेशनसँगै कोशी नाम खारेजी, पूनःनामकरण आन्दोलन पनि सुरु हुने भएपछि आज शनिवार बिहान ६ बजे देखी लागु हुने गरी मोरङ जिल्ला प्रशासनले विराटनगरको ५ स्थान तोकेर निषेधित क्षेत्र घोषणा गरेको छ ।
प्रदेश सभाको बजेट अधिवेशन जेठ १४ गते आइतबार देखी सुरु हुँदैछ । यसै बेला प्रदेश न.१ पुनः नामाङ्कन संयुक्त सङ्घर्ष समितिले सोही दिन देखी विराटनगरमै धर्ना कसेर प्रदेश सभा घेराउ गर्दै सडक आन्दोलन पनि सुरु गर्दैछ ।
मोरङका प्रमुख जिल्ला अधिकारी वीरेन्द्रकुमार यादवले निषेधित क्षेत्र घोषणा गर्दै आन्दोलनले ‘शान्ति सुरक्षामा असर पार्न सक्ने भएकोले जिल्ला सुरक्षा समिति मोरङको निर्णय अनुसार जेठ १३ गते देखी अर्को आदेश नभए सम्म’ निषेधित क्षेत्र तोकिएको सूचना शुक्रवार जारी गरेको हो ।
सूचना अनुसार निषेधित क्षेत्र तोकिएको चार किल्लाहरूमा १. प्रदेश सभाको सुरक्षाका लागि पूर्वमा देवकोटा चौक देखि पश्चिममा कोशी अस्पताल चोक सम्मको क्षेत्रमा सभा, जुलुस, भेला, र्याली, धर्ना गर्न नपाइने जनाएको छ ।
सोही अनुसार २. मुख्यमन्त्री तथा मन्त्रिपरिषद्को कार्यालय वरिपरि रोडशेष चौक देखी दक्षिण जतुवा चौक सम्म, ३. मुख्यमन्त्री निवास वरिपरि ३ सय मिटर छेउछाउ ।
४. प्रदेश प्रमुखको कार्यालय तथा निवास वरिपरि ३ सय मिटर । ५. जिल्ला प्रशासन कार्यालय, मोरङ डाँफे चोक देखी पूर्वको क्षेत्रलाई निषेधित क्षेत्र घोषणा गरिएको छ । आदेशको उल्लङ्घन गरेको पाइएमा प्रचलित कानुन बमोजिम कारबाही हुने जनाइएको छ ।
