धरान : धरानमा भएको ‘ग्याङ फाइट’मा संलग्न रहेको आरोपमा पक्राउ परेका उपमेयर अइन्द्र विक्रम बेघाका भाइ विष्णु बेघा यसअघि पनि विभिन्न मुद्दामा प्रहरी हिरासतमा पुगेका थिए ।
२०७६ सालमा सुजन भुजेल (वादीसहित) ले दिएको उजुरीका आधारमा ज्यान मार्ने उद्योगमा संलग्न विष्णुले ५ हजार जरिवानासहित ६ महिना कैद सजाय भुक्तान गरेको रेकर्ड इलाका प्रहरी कार्यालय धरानमा पाइएको छ ।
त्यसैगरी २०७७ सालमा प्रकाश मगरको उजुरीमा विष्णुविरुद्ध ज्यान मार्ने उद्योगको मुद्दा दर्ता भएको थियो । उक्त मुद्दामा भने विष्णुले सफाइ पाएका थिए । तर रिहा भएपछि पनि विष्णु झगडा जस्ता विभिन्न अपराधमा संलग्न रहेको प्रहरी स्रोतले जनाएको छ ।
मुद्दा दर्ता नभए पनि विष्णुमाथि पटक पटक अभद्र व्यवहारको आरोप लागेको प्रहरी स्रोत बताउँछ । स्रोतका अनुसार २०७७ सालमा बिसन श्रेष्ठले विष्णुविरुद्ध अभद्र व्यवहारको मुद्दा दर्ता गराए पनि उनी धरौटीमा रिहा भएका थिए ।
हिजो (भदौ २६ गते) विष्णुको समूह र सन्देश राईको समूहबिच भएको ‘ग्याङ फाइट’मा राई गम्भीर घाइते भएका छन् । जिल्ला प्रहरी कार्यालय सुनसरीका प्रवक्ता तथा डिएसपी नवीनकृष्ण भण्डारीका अनुसार राईलाई विष्णुको समूहले धारिलो हतियार प्रहार गरी भागेको थियो । बदलामा राईको ग्याङले उपमेयर बेघाको घरमा प्रवेश गरी विष्णुमाथि आक्रमण गरेका हुन् ।
अराजक समूहको आक्रमणपछि उपमेयर अइन्द्र बेघाले फेसबुक लाइभ गर्दै धरानका डिएसपी नवराज मल्ललाई फोन गरेर तत्कालै प्रहरीलाई खबर गरे पनि प्रहरी नआएको गुनासो राखेका थिए ।
प्रहरी समयमै नआएपछि अराजक समूह भागेको उनको आरोप छ । तर घटनाको जानकारी पाए लगत्तै दुई प्रहरी घटनास्थलमा पुगेको स्रोतले जनाएको छ ।
उपमेयर बेघाको फेसबुक लाइभ डेढ लाखभन्दा बढीले हेरिसकेका छन् भने लाइभ भिडियोमा ६५० भन्दा बढी कमेन्ट आएका छन् । उपमेयर बेघाका भाइको स्वास्थ्य लाभको कामना गर्दै सामाजिक सञ्जालमा थुप्रैले पोस्ट गरेका छन् ।
विष्णुको टाउको र अनुहारमा चोट लागेको छ । तर विष्णुको समूहको प्रहारबाट गम्भीर घाइते भएका राईको स्वास्थ्य अवस्था भने चिन्ताजनक रहेको छ ।
विष्णुको स्वास्थ्य सामान्य भएकाले प्रहरीले घटनाबारे अनुसन्धान गर्न उनलाई राति नै नियन्त्रणमा लिएको थियो । हालसम्म प्रहरीले उपमेयर बेघाका भाइसहित ८ जनालाई नियन्त्रणमा लिएको छ ।
डिएसपी नवीनकृष्ण भण्डारीले घटनाको अनुसन्धान प्रारम्भिक चरणमा रहेकाले त्यसपछि मात्रै विस्तृत विवरण दिन सकिने बताए ।