विराटनगर : राज्यले शिक्षा क्षेत्रमा ठुलो लगानी गरे पनि प्रतिफल प्राप्त हुन नसकेको बताउँदै विराटनगरका मेयर नागेश कोइरालाले महानगरका सामुदायिक विद्यालयहरूलाई प्रतिस्पर्धी क्षमता र गुणस्तरमा सुधार गर्नुपर्नेमा ध्यानाकर्षण गरेका छन् ।
गोग्राहा माविको सम्मान, पुरस्कार तथा छात्रवृत्ति वितरण समारोहमा मेयर कोइरालाले अध्ययन र अतिरिक्त क्रियाकलापको प्रतिस्पर्धी क्षमता वृद्धिसँगै गुणस्तरमा समेत विराटनगरका सामुदायिक विद्यालयहरूले सुधार ल्याउन जरुरी देखिएको छ । उनले भने ‘राज्यले शिक्षा क्षेत्रमा ठुलो लगानी गरे पनि प्रतिफल अझै प्राप्त हुन सकेको छैन ।’
विद्यार्थीमा व्यवहारिक, सीपमूलक र नैतिक शिक्षाको जरुरी रहेकोमा पनि मेयरले जोड दिए । सामुदायिक विद्यालयहरू बिच नै गुणस्तरमा प्रतिस्पर्धा हुनुपर्ने उनको भनाई छ । पछिल्लो समय केही सामुदायिक विद्यालयको गुणस्तर वृद्धि भएकै कारण अभिभावक र विद्यार्थीको आकर्षण बढ्दै गएको उनले बताए ।
मेयर कोइरालाले भने ‘सबै सामुदायिक विद्यालयको गुणस्तरमा सुधार आउनुपर्छ । अनि मात्रै हामीले उत्पादन गरेका जनशक्ति विश्वको श्रम बजारमा सहजै बिक्री हुन सक्छन् ।’ त्यसका लागि विद्यालय तहदेखि नै सीपमूलक र व्यवहारिक शिक्षा दिनुपर्नेमा उनले जोड दिए ।
कार्यक्रममा विद्यालयबाट अवकाश प्राप्त गरी बिदाइ भएका शिक्षकहरू विष्णु भुजेल, श्याम गजुरेल, शंकरप्रसाद दाहाल र डिल्लीप्रसाद कोइरालालाई सम्मानपत्र प्रदान गरिएको थियो । कक्षागत परीक्षामा उत्कृष्ट हुने विद्यार्थीहरूलाई पुरस्कार वितरण गरिएको थियो ।
