धरान : धरान-१ मा दिउसै साथी साथीबिचमै खुकुरी हानाहान हुँदा २ जना घाइते भएका छन् ।
शुक्रवार धरान-१ स्थित सिहदेबी चोक नजिकै भएको घटनामा धरान-१६ गणेशमान चोकका-१६ वर्षीय सोहिल श्रेष्ठ र धरान ३ का सुजल सुन्दास घाइते भएका छन् ।
घाइते दुवैको बिपी कोइराला स्वास्थ्य विज्ञान प्रतिष्ठानमा उपचार भइरहेको छ ।
दुवैले एक अर्कालाई खुकुरी प्रहार गरेको खुलेपछि प्रहरीले नियन्त्रणमा लिएर उपचार गराइरहेको छ । घटनामा संलग्न भएको आशङ्कामा थप २ जना नियन्त्रणमा लिएर अनुसन्धान भइरहेको इलाका प्रहरी कार्यालय धरानले जनाएको छ ।
घाइते सोहिलका अनुसार आफ्नी आमा आशिका जोशी (३२ वर्ष) सङ्गै साथी सुजल र उनी पनि हिँडिरहेका थिए । धरान १ र २ को सिमाना सिंहदेवी चोक पुगेपछि सुजलले आफ्नी आमालाई अचानक गाली गरेपछि आफूले झापड हानेको बताए । त्यसपछि सुजलले झोलाबाट एक्कासि खुकुरी निकालेर प्रहार गरेको सोहिलले बताए । सुजलको हातबाट खुकुरी भुईँमा खसेको मौकामा सोही खुकुरी टिपेर आफूले पनि सुजललाई प्रहार गरेको उनले जानकारी दिए ।
खुकुरी प्रहारबाट सोहिलको टाउकोमा गहिरो चोट लागेको छ भने सुजलको टाउको, कानको मुनि गर्धन र दाहिने पातामा चोट छ ।
