_1749430366.gif)
इटहरी : सुन्दरहरैंचा नगरपालिकाको कर समायोजन नभए कार्यालयमा तालाबन्दी गर्ने स्थानीयले चेतावनी दिएका छन् । वडा नम्बर २ का स्थानीयले ध्यानाकर्षण पत्र बुझाउँदै नगरपालिकाले वृद्धि गरेको कर तथा राजस्व घटाउन माग गरेको हो ।
यसअघि असोज मसान्त देखि २५ प्रतिशत कर घटाउने सहमति भए पनि नगरपालिकाले पुरानै दरमा राजस्व सङ्कलन गरिरहेको स्थानीयको गुनासो छ । सोमबार वडा अध्यक्ष विवश प्रधानलाई पत्र बुझाएका स्थानीयबासीले मङ्सिर २१ गते सम्मको अल्टिमेटम दिएका छन् । सो समय सीमा भित्र कर समायोजन नभए वडा कार्यालयको राजस्व शाखामा तालाबन्दी गर्ने उनीहरूको भनाइ छ ।
३६ जना स्थानीयले प्रतिनिधिमूलक हस्ताक्षर गरेर वडाध्यक्ष मार्फत नगरपालिकाको ध्यानाकर्षण गराएका हुन् । पछिल्लो समय स्थानीय तहले वृद्धि गरेको राजस्व, शुल्क तथा जरिवाना विरुद्ध स्थानीय आक्रोशित छन् ।
