धरान : धरान-८ तीनकुने अस्थायी प्रहरी पोष्टले आइतबार राती धरान-१५ की २३ वर्षीय सुजना राई, २५ वर्षीय निशा श्रेष्ठ, २४ वर्षीय मौसम लिम्बुलाई प्रतिबन्धित, नियन्त्रित लागुऔषधी सहित पक्राउ गरेको छ ।

उनीहरूलाई आइतबार राती ११ बजेको समयमा सेउती पुल नजिकबाट स्कुटरमा धरान आउँदै गरेको अवस्थामा पक्राउ गरिएको कोसी प्रदेश प्रहरी कार्यालय विराटनगरले जनाएको छ ।

प्रहरीले उनीहरूबाट प्रतिबन्धित औषधी ट्रामानिल २ सय क्याप्सुल र नियन्त्रित औषधी स्पास्पेन २ सय ट्याब्लेट बरामद गरेको छ ।

यसैगरी इलाका प्रहरी कार्यालय धरानको प्रहरी टोलीले सिराहा चन्द्रअयोध्यापुर घर भई धरान-९ दौलत थुलुङको घरमा डेरा गरी बस्ने २३ वर्षीय अङ्कित कुमार सिंह, धरान-८ का २० वर्षीय साइमन राई र २३ वर्षीय सागर श्रेष्ठलाई प्रतिबन्धित औषध सहित पक्राउ गरेको छ ।

प्रहरीले उनीहरूबाट ट्रामानिल ९ हजार ३ सय क्याप्सुल र स्पास्पेन ६ हजार ६ सय २७ ट्याब्लेट बरामद गरेको छ । पक्राउ परेका ६ जनाको इलाका प्रहरी कार्यालय धरानले थप अनुसन्धान गरिरहेको छ ।