मोरङ : मोरङको पथरीशनिश्चरे वडा नम्बर १ मा सोमबार  ट्रकको ठक्करबाट धरानका एक युवकको मृत्यु भएको  छ ।

सोमबार साँझ करिब ७ बजे पश्चिमबाट पूर्वतर्फ आउँदै गरेको एनएल ०१ एडि ५५११ नम्बरको भारतीय ट्रकको ठक्करबाट प्रदेश १-००२-०४०प ६०२५ नम्बरको मोटरसाइकलमा सवार धरान-११ का २५ वर्षीय टार्जन राईको घटनास्थलमै मृत्यु भएको इलाका प्रहरी कार्यालय पथरीका प्रहरी निरीक्षक खगेन्द्र एक्तेनले जानकारी दिए ।

राईको शवलाई पोष्टमार्टमका लागि उर्लाबारीस्थित मदन भण्डारी अस्पताल तथा ट्रमा सेन्टरमा राखिएको छ । ठक्कर दिने भारतीय ट्रक र ट्रकका चालक ४२ वर्षीय दिनेशकुमार दासलाई नियन्त्रणमा लिएर अनुसन्धान सुरु गरेको पथरी प्रहरीले जनाएको छ ।

पछिल्लो एक साता यता उर्लाबारी पथरी सडक खण्डमा आठ जनाको सडक दुर्घटनामा मृत्यु भइसकेको छ ।