धरान : इटहरी-धरान सडक इटहरी-४ हलगडामा प्रहरीले भारतीय नम्बर बीआरओ १ बीयु ४२८० को कारबाट ३६ केजी ८५० ग्राम गाँजा बरामद गरेको छ ।

हलगडा स्थित अस्थायी प्रहरी चौकी र ट्राफिक प्रहरी पोष्टको संयुक्त प्रहरी टोलीले सोमवार राती ८ बजे चेकजाँच गर्दा गाँजा बरामद गरेको कोशी प्रदेश प्रहरी कार्यालय विराटनगरले जनाएको छ ।

गाँजा कारको डिक्की भित्र १८ वटा पोकामा प्याक गरिएको अवस्थामा थियो । गाँजा र गाडीलाई प्रहरीले नियन्त्रणमा लिएको छ । पक्राउ परेका मानिस र सवारी साधनको बारेमा थप अनुसन्धान भइरहेको छ ।

झापाको मेचीनगर–६ बाट सोमवार साँझ प्रहरीले बुद्धशान्ती गापा–२ का २१ वर्षीय प्रजित तामाङलाई २ ग्राम ३९० मिलिग्राम लागुऔषध ब्राउन सुगर सहित पक्राउ गरेको छ । उनलाई लागु औषध नियन्त्रण ब्युरो काँकडभिट्टाको प्रहरी टोलीले पक्राउ गरेको हो ।

मोरङको रङ्गेली-५ का २७ वर्षीय धिरज कुमार झालाई १० ग्राम ४०० मिलिग्राम ब्राउन सुगर सहित प्रहरीले पक्राउ गरेको छ । साथै २१ वर्षीय सञ्जय कुमार मण्डललाई निषेधित औषधी ट्रमाडोल ५३०० क्याप्सुल, स्पाशपैन २००० ट्याबलेट, डाइसे १३६०० ट्याबलेट सहित पक्राउ गरेको छ ।

दुवै युवालाई इलाका प्रहरी कार्यालय रङ्गेली र लागुऔषध नियन्त्रण ब्युरो विराटनगरको प्रहरी टोलीले चेक जाँचको क्रममा पक्राउ गरेको हो ।

बराहक्षेत्र-१ बाट उदयपुर चौदण्डी-४ का ३२ वर्षीय नरजित राईलाई निषेधित लागुऔषध ट्रमाडोल १८८ ट्याब्लेट, स्पासपैन १८८ ट्याब्लेट सहित पक्राउ गरेको छ । राईलाई इलाका प्रहरी कार्यालय चतराको प्रहरी टोलीले पक्राउ गरेको हो ।