धरान :  इलाका प्रहरी कार्यालय भेडेटारले सहिदभुमि-७ का ३९ वर्षीय निकेन्द्र राई र उनको श्रीमती ३० वर्षीय निशा राईलाई गाँजा सहित मङ्गलवार पक्राउ गरेको छ ।

कोशी प्रदेश प्रहरी कार्यालय विराटनगरले जनाए अनुसार चेकजाँचको क्रममा दम्पतीलाई को ३३ प ९३०७ नम्बरको मोटरसाईकलमा १६ किलोग्राम गाँजा बोकेको फेला पारी पक्राउ गरिएको हो ।

वडा प्रहरी कार्यालय धरानको प्रहरी टोलीले धरान-१२ मा डेरा गरी बस्दै आएकी २२ वर्षीय सम्झना लिम्बूलाई निषेधित औषधी १८२ चक्की र गाँजा १०० ग्राम सहित पक्राउ गरेको छ ।

यसैगरी प्रहरीले झापाको मेचीनगर-६ बाट पाँचथर मिक्लाजुङ-४ का ३१ वर्षीय दिलप्रसाद राई र दमक-२ की २९ वर्षीय स्मारिका नेम्बाङलाई लागुऔषध ब्राउनसुगर सहित पक्राउ गरेको छ ।

लागुऔषध नियन्त्रण ब्युरो काँकरभिट्टाको प्रहरी टोलीले चेकजाँचको क्रममा उनीहरूबाट ४ ग्राम ब्राउन सुगर सहित पक्राउ गरेको हो ।

इलामको देउमाई-३ का ५० वर्षीय रमेश अधिकारीलाई ब्राउनसुगर १ ग्राम ७४० मिलिग्राम, लागुऔषध ९२ चक्की सहित इलाका प्रहरी कार्यालय मङ्गलबारेले पक्राउ गरेको छ ।