सुनसरी : हिसान स्पोर्टस मिट अन्तर्गत हिसान एन्फा सुनसरी कप अन्तर विद्यालय फुटबल प्रतियोगिताको सोमबारको खेलमा ज्ञान दर्पण, विश्व आदर्श, कोशी सेन्टजेम्स र इम्पेरियल कलेज बिजयी हुँदै अघिल्लो चरणमा प्रवेश गरेका छन् ।
सोमबारको पहिलो खेलमा ज्ञान दर्पण एकेडेमीले सियोन स्कुल धरानलाई पेनाल्टी सुट आउटमा ३-२ गोल अन्तरले पराजित गरेको छ ।
दोस्रो खेलमा विश्व आदर्श कलेजले लर्डबुद्ध इन्टरनेशनल स्कुललाई ५-० गोल अन्तरले पराजित गरेको छ ।
तेस्रो खेलमा कोशी सेन्ट जेम्सले नास्ट कलेज धरानलाई ४-० ले पराजित गर्दा अन्तिम खेलमा इम्पेरियल कलेजले प्रिमियर कलेजलाई सडेन डेथमा पराजित गरेको प्रतियोगिता संयोजक एवं एन्फा सुनसरी महासचिव कोबिदजंग कार्कीले जानकारी दिए । 
क्रिकेटमा कस्तुरी र पूर्वाञ्चलको बिजयी सुरुवात
सुनसरी उच्च शिक्षालय तथा माध्यमिक विद्यालय सङ्घ हिसान सुनसरीको स्पोर्टस मिट अन्तर्गत क्रिकेट प्रतियोगितामा कस्तुरी र पूर्वाञ्चल कलेजले बिजयी सुरुवात गरेका छन् ।
सोमबार हुने भनिएको उद्घाटन खेलमा पिसजोन उच्च मावि नआएपछि कस्तुरी कलेज वाक ओभर पाएर बिजयी बनेको हो ।
दोस्रो खेलमा पूर्वाञ्चल कलेजले प्रिमियर कलेजलाई १९ रनले पराजित गर्दै उत्कृष्ट सुरुवात गरेको छ ।
मङ्गलवार हुने पहिलो खेलमा सुष्मा गोदावरी कलेज र सिबी कलेजबिच प्रतिस्पर्धा हुनेछ । दोस्रो खेलमा इटहरी नमुना कलेज र कोशीसेन्टजेम्स कलेजबिच प्रतिस्पर्धा हुने आयोजकले जनाएको छ । माघ १८ गतेसम्म चल्ने क्रिकेट प्रतियोगितामा सुनसरीभरिका एक दर्जन उच्च माविहरूको सहभागिता रहेको थियो ।
छात्र, छात्रा भलिबल पनि सुरु
स्पोर्टस मिट अन्तर्गत छात्र छात्रा भलिबल पनि सोमबारबाट सुरु भएको छ । सोमबार भएको छात्रतर्फको पहिलो खेलमा पूर्वाञ्चल कलेजले कोशीसेन्टजेम्स कलेजलाई पराजित गरेको छ ।
दोस्रो खेलमा बिश्वआदर्श कलेजले पिसजोन उच्च मावि लाई पराजित गरेको छ । तेस्रो खेलमा नास्ट कलेज नआएपछि लर्डबुद्ध इन्टरनेशनल कलेज वाक ओभर पाएर बिजयी भएको छ ।
चौथो खेलमा बेबिलोन स्कुलले ग्रीनपिस स्कुललाई पराजित गरे पनि प्रोटेस्ट परेकाले छानबिन भइरहेको जनाइएको छ । पांचौ खेलमा सुष्मा कलेजले इम्पेरियल कलेजलाई पराजित गरेको छ । अन्तिम खेलमा ज्ञान दर्पण एकेडेमीले प्रिमियर कलेजलाई पराजित गरेको छ ।
छात्रातर्फ पनि सोमबार चार खेल सम्पन्न भएका छन् । पहिलो खेलमा पूर्वाञ्चल कलेजले कस्तुरी कलेजलाई पराजित गर्दा दोस्रो खेलमा लर्डबुद्ध कलेज नआएपछि प्रिमियर कलेज वाक ओभर पाएर बिजयी बनेको छ ।
तेस्रो खेलमा बिश्वआदर्श कलेजले सुष्मा कलेजलाई पराजित गरेको छ । अन्तिम खेलमा धरान आदर्शले ग्रिनपिस कलेजलाई पराजित गर्दै दोस्रो चरणमा प्रवेश गरेको छ ।