धरान : धरान-१५ सुसन टोलका १८ वर्षीय उषण भूजेललाई मङ्गलवार दिउँसो प्रहरीले प्रतिबन्धित लागुऔषध सहित पक्राउ गरेको छ ।

अस्थायी प्रहरी चौकी श्याम चोकको प्रहरी टोलीले उनको घरमा छापा मारेर कोठाको खानतलासी गर्दा झोलामा लुकाई राखेको लागुऔषध स्पासपाइन २ हजार ८० चक्की बरामद भएको थियो ।

कोशी प्रदेश प्रहरी कार्यालय विराटनगरले जनाए अनुसार पक्राउ परेका भूजेललाई थप अनुसन्धानका लागि इलाका प्रहरी कार्यालय धरानको हिरासतमा राखिएको छ ।

यसैगरी सुनसरीको देवानगञ्ज गा.पा.-३ का ४० वर्षीय अर्बिनकुमार यादव र उनकी ३५ वर्षीय श्रीमती सोनी कुमारी यादवलाई गाँजा सहित प्रहरीले पक्राउ गरेको छ ।

कोशी प्रदेश प्रहरी कार्यालय प्रादेशिक अनुसन्धान समूह र जिल्ला प्रहरी कार्यालय सुनसरीको प्रहरी टोलीले यादवको घर कम्पाउण्डमा खानतलाशी गर्दा घर भित्र जेब्रा झोलामा लुकाई राखेको ३९ किलो २९० ग्राम गाँजा बरामद गरेको छ ।