इटहरी : कोशी प्रदेश सरकारले प्रदेश प्रहरी, यातायात मजदुर, व्यवसायी र सरोकारवालाको परामर्शबाट सार्वजनिक यातायातको सुधार तथा सडक दुर्घटना न्यूनीकरण योजना ल्याउने प्रदेशका आन्तरिक मामिला तथा कानुन मन्त्री रेवतीरमण भण्डारीले बताएका छन् ।
नेपाल यातायात स्वतन्त्र मजदुर सङ्गठन र नेपाल यातायात मजदुर सङ्घको सडक सुरक्षा सचेतना जागरण अभियान कार्यक्रममा आइतबार उनले भने ‘सार्वजनिक यातायातको सुधार, दुर्घटना न्यूनीकरणका योजना अन्तिम चरणमा पुगेको छ ।’
मन्त्री भण्डारीका अनुसार कोशी प्रदेश प्रहरी कार्यालयले अन्तिम तयारी गरिरहेको छ, त्यसमा यातायात मजदुर, व्यवसायीहरू र सरोकारवालाहरू सँग छलफल गरेर योजना कार्यान्वयन गरिने छ ।
उनले सडक दुर्घटना न्यूनीकरण सबैको साझा विषय भएको बताउँदै उनले मजदुर सङ्गठनहरूले अभियान सुरु गरेकोमा खुसी व्यक्त गरे ।
सङ्गठनका केन्द्रीय अध्यक्ष भीमज्वाला राईले सडक दुर्घटनाको चित्र सहित सडक सुरक्षा, चासो र हाम्रो भूमिका विषयक कार्यपत्र प्रस्तुत गरे । कार्यपत्रमा कोशी प्रदेश भरी सञ्चालन गरिने सडक सुरक्षा सचेतना प्रशिक्षण कार्यक्रमको योजना उल्लेख गरे ।
एक महिना दुई प्रशिक्षण गरिने योजनामा सङ्गठन र सङ्घका प्रदेशका कमिटीहरू र महासङ्घ आबद्ध व्यवसायी सङ्घहरूले प्रत्येक १५ दिनमा प्रशिक्षण गर्ने कुरा उल्लेख छ । ट्राफिक प्रहरी प्रशिक्षकबाट चालक, सहचालक, परिचालक र व्यवसायी समेत प्रत्येक कक्षामा २५ जना रहने छन् ।
कार्यक्रममा सहायक प्रमुख जिल्ला अधिकारी बेदराज फूयाल, कोशी प्रदेश प्रहरी प्रमुख डिआइजी राजन अधिकारी, जिल्ला प्रहरी सुनसरी एसपी सुमन तिम्सिना, राजमार्ग सुरक्षा तथा ट्राफिक व्यवस्थापन कोशीका एसपी विनोद घिमिरे, यातायात व्यवसायी राष्ट्रिय महासङ्घ कोशी संयोजक सरोज श्रेष्ठ लगायत सहभागी थिए ।
sadak-jagaran