_1735354691.gif)
इटहरी : पछिल्लो समय स्थानीय तहमा भ्रष्टाचारको शृङ्खला बढ्दै गएको अख्तियार दुरुपयोग अनुसन्धान आयोगले उल्लेख गरेको छ ।
स-साना योजना र कार्यक्रममा समेत भ्रष्टाचारको उजुरी पर्ने गरेको र भ्रष्टाचारको तरिका समेत परिवर्तन भएको जनाएको हो ।
स्थानीय तहमा मुख्यतः सफ्टवेयर खरिद, डिपिआर निर्माण, उपभोक्ता समितिको योजना, शैक्षिक सामग्री खरिद, स्वास्थ्य उपकरणको खरिद लगायत विषयमा धेरै भ्रष्टाचार हुने गरेको छ ।
अख्तियार दुरुपयोग अनुसन्धान आयोगको ३४ औँ स्थापना दिवसको अवसरमा इटहरीमा आयोजित कार्यक्रममा भ्रष्टाचारको बदलिँदो तरिका बारे जानकारी गराइएको हो ।
इटहरी कार्यालयका प्रमुख सुरेश न्यौपानेका अनुसार भ्रष्टाचार गर्ने शैलीमा परिवर्तन आएको र स्थानीय तहका विषयमा पर्ने उजुरीको सङ्ख्या बढिरहेको छ ।
पहिला भौतिक पूर्वाधार, विकास निर्माणका धेरै उजुरी पर्ने गरे पनि पछिल्ला खरिद र डिपिआर निर्माणको क्षेत्र बढी भ्रष्टाचारले जकडिएको बताए । अख्तियारमा पर्ने उजुरीका आधारमा ५० प्रतिशत उजुरी स्थानीय तहको शिक्षा र स्वास्थ्यको हुने गरेको छ ।
कोशी प्रदेश प्रमुख पर्शुराम खापुङको प्रमुख आतिथ्यमा भएको कार्यक्रममा इटहरी उपमहानगरपालिकाका मेयर हेम कर्ण पौडेलले अख्तियारमा समेत भागबन्डा हुने गरेको भन्दै स्वतन्त्र अनुसन्धानमा संशय व्यक्त गरे ।
स्थानीय तहले आफ्नो अधिकार प्रयोग गरिरहेको अवस्थामा कतिपय उजुरी र अनुसन्धान स्वतन्त्र नहुने आशयको मन्तव्य राखे ।
_1664681437.jpg)
