_1735354691.gif)
इटहरी : अख्तियार दुरुपयोग अनुसन्धान आयोग प्रति इटहरी उपमहानगरपालिकाका मेयर हेमकर्ण पौडेलले आशङ्का व्यक्त गरेका छन् ।
आयोगको ३४ औँ स्थापना दिवसको अवसरमा मन्तव्य राख्दै पौडेलले राजनीतिक भागबन्डाका आधारमा छनौट हुने अख्तियारका अधिकारीहरूबाट छानबिनको निष्पक्षतामा शङ्का गरेका हुन् ।
राजनीति संरक्षित भ्रष्टाचारले देशलाई निलेको बताउँदै उनले आम नागरिकले अख्तियारलाई निष्पक्ष निकायको रूपमा नबुझेको र कतैकतै चकेको महसुस गरेको बताए । अख्तियार कतैकतै प्रभावमा परेको र राजनीति नेतृत्वको वरिपरि घुमेको जनताले बुझेको उनको भनाइ थियो ।
अख्तियार अनुसन्धानको नयाँ चरणमा प्रवेश गरेको बताउँदै उनले अधिकारीहरूलाई जागिरको जीवनमा कमाएको प्रतिष्ठालाई धूलिसाथ नगर्न सुझाव दिए । सबै कुरा राजनीति सँग जोडिएको र राजनीति ठिक भयो भने सबै सुध्रिएर जाने बताए ।
तिन वटै सरकारमा विवादास्पद अधिकारका सुचीहरू रहेको स्मरण गराउँदै मेयर पौडेलले स्थानीय सरकारलाई ५ केजीको ढक झुन्ड्याएर दौडिन लगाएको गुनासो गरे । संविधान संशोधन गरेर स्थानीय तहलाई जनतासँग जोडिएका आधारभूत विषयको अधिकार दिनुपर्ने धारणा राखे ।
जनप्रतिनिधिलाई प्रशिक्षण नभएको कारण धेरै मेयरहरू फसिरहेको उल्लेख गरे । आग्रह र पूर्वाग्रहका कारण अख्तियारमा उजुरी बढेको बताउँदै अख्तियारले राम्रै अनुसन्धान गरिरहेको भन्दै विषयलाई सन्तुलित बनाए ।
आयोगले स्थानीय तहमा मुख्यतः सफ्टवेयर खरिद, डिपिआर निर्माण, उपभोक्ता समितिको योजना, शैक्षिक सामग्री खरिद, स्वास्थ्य उपकरणको खरिद लगायत विषयमा धेरै भ्रष्टाचार हुने गरेको उल्लेख गरेको थियो ।
_1664681437.jpg)
